Qazaqstannyń paralımpıadashylary Londonǵa attandy
ASTANA. 23 tamyz. QazAqparat - Búgin tańerteńgi reıspen Paralımpıadalyq oıyndarǵa qatysatyn Qazaqstannyń qurama komandasy Londonǵa ushyp ketti.
Tamyzdyń 29-y jáne qyrkúıektiń 9-y aralyǵynda ótetin XIV Paralımpıadalyq oıyndarda Qazaqstannyń namysyn 7 sportshy - Ánýar Ahmetov (júzý), Islam Sálimov (jeńil atletıka), Aınur Baıdildaeva (jeńil atletıka), Sergeı Harlamov (jeńil atletıka), Zúlfııa Ǵabıdýllına (júzý), Aıbek Ábjan (paýerlıftıng) jáne Qabıra Asqarova (paýerlıftıng) qorǵaıdy. Olar 165 elden keletin 4 200 sportshymen ózara synǵa túsip, 20 sport túri boıynsha 502 medaldy sarapqa salatyn bolady. Aıta keter jáıt, Qazaqstannyń sportshylary XXX Olımpıada oıyndary ótken Ulybrıtanııanyń London qalasyna baryp, Qazaqstannyń Ánurany jeti márte oınaǵan «ExCel» sport keshende óner kórsetpek. Jarys jolyn Qabıra Asqarova bastaıdy. Tamyzdyń 31-kúni ol 44 keli salmaqta paýerlıvtıngten synǵa túsedi.
Budan buryn QR Sport jáne deneshynyqtyrý agenttigi tóraǵasynyń orynbasary, Qazaqstannyń Pralımpıadalyq komıtetiniń basshysy Elsııar Qanaǵatov habarlaǵandaı, XIV Paralımpıadalyq oıyndarda altynnan alqa taqqan sportshylarǵa - 50 myń, kúmiske - 35 myń, qola úshin - 25 myń, sondaı-aq tórtinshi orynǵa - 14 myń, besinshi orynǵa - 6 myń jáne altynshy orynǵa 4 myń AQSh dollary kólemindegi syıaqy taǵaıyndalǵan.
