Qazaqstannyń ózge óńirlerindegi azamattardyń atyna nesıe alyp kelgen semeılik ustaldy
ShQO Polıtsııa departamenti baspasóz qyzmetiniń málimetine súıensek, alaıaq tanymal ınternet saıttarynyń biri arqyly Soltústik Qazaqstan oblysy Qyzyljar aýdanynyń 38 jastaǵy turǵynynyń jeke derekterin paıdalanyp nesıe alǵan. Tsıfrlyq tehnıka dúkeninde taýardy nesıege resimdegen ol jábirlenýshige 200 myń teńge mólsherinde materıaldyq zalal keltirdi.
Osy qylmystyq shemany paıdalanǵan semeılik Petropavl qalasynda turatyn 41 jastaǵy azamattyń atyna 1 mln teńge nesıe resimdedi. Jedel-izdestirý sharalaryn júrgizgen krımınaldyq polıtsııa qyzmetkerleri 26 jastaǵy kúdiktini qolǵa túsirdi. Onyń ǵalamtor arqyly jasalǵan basqa da qylmystarǵa qatystylyǵy tekserilýde.
«Turaqty jumys orny joq er adam buryn sottalmaǵan. Jaýap alý barysynda ol óz kinásin moıyndady. Іstiń barlyq mán-jaıy anyqtalýda. Atalǵan fakti boıynsha QR Qylmystyq Kodeksiniń 190-baby 2-bóligi 4-tarmaǵyna (Alaıaqtyq) sáıkes sotqa deıingi tergeý amaldary bastaldy», - dep habarlady vedomstvo ókilderi.