Qazaqstannyń Ózbekstandaǵy mádenıet kúnderi «Abaı» operasymen aıaqtaldy
«Álisher Naýaı atyndaǵy Úlken teatr sahnasynda ataqty qoıylymmen Abaı atyndaǵy Qazaq ulttyq opera jáne balet teatry óner kórsetti. Men bul mádenı is-sharany ashý qurmetine ıe boldym. Kórermendi quttyqtap, Qazaqstannyń mádenıet kúnderin uıymdastyrýǵa kómekteskeni úshin baýyrlas elge alǵysymdy bildirdim.
«Abaı» operasy kezdeısoq tańdalmady. Abaı Qunanbaıuly – qazaq halqynyń ǵana emes, búkil álem úshin dańqty tulǵa. Abaı árqashan adamzat balasyn súıýge shaqyrǵan. Osy qaǵıdalarǵa súıene otyryp, biz ózbek áriptesterimizben qarym-qatynasty nyǵaıtý baǵytynda jumys isteımiz dep kelistik. Odan bólek, bıyl Ahmet Jubanov pen Latıf Hamıdı daıyndaǵan shyǵarmaǵa 80 jyl tolady.
Kórermender qoıylymǵa rıza boldy, qoshemet uzaq ýaqyt boıy basylmady. Qoıylym aıaqtalǵannan keıin de sahnaǵa shyǵyp akterlerimizge tamasha óner kórsetkeni úshin alǵys aıttym», - dep jazady mınıstr.
Aıtýynsha, Ózbekstandaǵy Qazaqstannyń mádenıet kúnderiniń tórt kúndik baǵdarlamasy óte qarqyndy bolǵan. Máselen, 20 maýsymda Tashkenttegi «Týrkıston» óner saraıynda Roza Baǵlanova atyndaǵy «Qazaqkontsert» MKU artısteriniń gala-kontserti ótti. Artısterimiz 22 maýsymda Samarqan oblystyq mýzykalyq-drama teatrynda, 23 maýsymda Buharadaǵy jastar ortalyǵynyń kontsert zalynda óner kórsetti.
«Al, Tashkenttegi Álisher Naýaı atyndaǵy kınoteatrda 20-23 maýsym aralyǵynda Qazaqstannyń kıno kúnderi ótti. Baǵdarlamaǵa «Muqaǵalı» (rejısser Bolat Qalymbetov), «Dos-Muqasan» (rejısser Aıdyn Sahaman), «Paralımpıadashy» (rejısser Aldııar Baıraqymov), «Startta» (rejısser Ernar Nurǵalıev), «1941 jyldyń jazy» (rejısser Bekbolat Shekerov) kartınalary, qalpyna keltirilgen «Sultan Beıbarys» (rejısser Bolat Mansurov) lentasy endi jáne «Kenje qyz», «Besik jyry», «Ámen aǵa aǵashy» anımatsııalyq fılmderi kórsetildi.
Qazaqstandyq artısterdiń qatysýymen ótetin mádenı is-sharalar munymen aıaqtalmaıdy. Mysaly, bıyl Ózbekstan Respýblıkasyna M. Óskinbaev atyndaǵy Mańǵystaý oblystyq fılarmonııasynyń gastroldik sapary josparlanǵan.
Ózbekstanǵa jumys saparym aıasynda men Tashkenttiń birqatar tarıhı-mádenı eskertkishin araladym. Bul – Tóle bı kesenesi jáne álemdegi eń kóne quran qoljazbasy saqtalǵan Hast-Imam meshiti.
Sonymen qatar, ózbek áriptesim Ozodbek Nazarbekovpen ekijaqty kezdesý ótkizdim. Biz elderimizdiń mádenıet jáne týrızm salasyndaǵy yntymaqtastyǵyn odan ári damytý máselesin talqyladyq», - deıdi Ashat Oralov.
Buǵan deıin Ózbekstanda Qazaqstannyń mádenıet kúnderi ótip jatqanyn habarlaǵan edik.
