Qazaqstannyń Ózbekstandaǵy Elshisi soǵys ardagerlerin quttyqtady
Keshe elshilik dıplomattary Tashkent qalasyndaǵy Qazaq ulttyq mádenı ortalyǵynyń járdemimen dańqty qazaq maıdangerlerine baǵaly estelik syılyqtar tabys etti. Merekelik shara aıasynda Qazaqstannyń Ózbekstadaǵy Tótenshe jáne Ókiletti Elshisi E.Ótembaev Tashkentte turyp jatqan Uly otan soǵysynyń ardageri, qazaq Shyrynbek Orazymbetovpen kezdesti.
Qazaqstan elshisi aqsaqaldy Jeńis kúnimen quttyqtady. «Sizdi gıtlerlik Germanııany jeńgen uly kúnmen qutyqtaý múmkinshiligine ıe bolǵanyma baqyttymyn ári maqtan tutamyn. Sizder shyn máninde bizder úshin eń qymbatty jansyzdar. Sizderdiń erlikterińiz ben batyrlyqtaryz, Otanǵa degen sheksiz mahabbattaryńyz, onyń halqyna degen adaldyqtaryńyz patrıotızmniń naǵyz úlgisi ári ósip kele jatqan urpaqty tárbıeleýdiń tiregi bolyp sanalady», - dedi E.Ótembaev.
Tashkent qalasynyń 93 jastaǵy turǵyny Shyrynbek Orazymbetuly Ońtústik Qazaqstan oblysynda dúnıege kelgen. Almaty áskerı ýchılışesinde oqyp júrgen kezinde maıdanǵa shaqyrylǵan. Baltyq jaǵalaýy maıdanyna, blokada qalǵan Lenıngradty qorǵaýǵa qatysty. Soǵystan keıin Tashkentke bilim alýǵa barǵan ol tarıhshy mamandyǵyn alyp shyqty. Tarıh ǵylymynan kandıdattyq qorǵap, uzaq jyldar boıy osy eldiń joǵary oqý ornynda dáris berdi, ǵylymı jáne qoǵamdyq qyzmetterdi de qatar alyp júrdi.
Jasynyń egde tartqanyna qaramastan aqsaqal soǵys kezindegi kóptegen jaıttardy áli de biledi. Urys kezinde óz polkynyń jaýyngerlik týyn qalaı alyp júrgenin de aıtyp berdi. Aqsaqal jaýyngerlik erligi úshin «Qyzyl tý», 1-shi dárejel «Otan soǵysy» ordenderimen, «Erligi úshin» medalimen marapattalǵan.
Ardager Shyrynbek Orazymbetuly Qazaqstan elshiliginiń qamqorlyǵyna alǵysyn bildirip, QR Prezıdenti N.Nazarbaevqa zor densaýlyq, Qazaqstandy damytýda zor tabystar, beıbitshilik pen kelisimdi aqtaý isinde mol qajyrly eńbek tiledi.
Aıta keterligi, búgin Qazaqstannyń Ózbekstandaǵy Elshiligi Tashkentte akkredıttelgen sheteldik dıplomatııalyq korpýs ókilderimen birge Táýelsizdik alańyndaǵy máńgilik alaýǵa, Tashkentte dúnıege kelgen qazaq generaly, Keńes Odaǵynyń Batyry Sabyr Rahymovtyń eskertkishine gúl shoqtaryn qoıý rásimine qatysady.
