Qazaqstannyń Ózbekstandaǵy elshiliginde daýys berý júrip jatyr - QR Prezıdentiniń kezekten tys saılaýy
TAShKENT. 3 sáýir. QazAqparat /Qurmat Samarhan/ - Qazaqstannyń Ózbekstandaǵy elshiliginde Qazaqstan Prezıdenttigine kandıdattar úshin daýys berý júrip jatyr.
Belgilengen ereje boıynsha Elshilik janyndaǵy №145-shi saılaý ýchaskesi jergilikti ýaqyt boıynsha saǵat 06.00-da ashyldy jáne Ózbekstan aýmaǵynda júrgen Qazaqstan azamattary saǵat 07.00-den bastap daýys bere bastady.
№145-shi saılaý ýchaskesiniń saılaý komıssııasynyń tóraǵasy, Qazaqstan elshiliginiń keńesshi-elshisi Ýálıhan Tórehanovtyń habarlaýynsha, qazirgi tańda Elshilikte Qazaqstan Respýblıkasynyń 2325 azamaty konsýldyq esepte tur. «Qazaqstan Respýblıkasy Prezıdentiniń saılaýyna úlken ázirlik jumystary júrgizildi. Bizdiń qyzmetkerlerimiz óńirlerdi aralap, bizdiń azamattarymyzben kezdesti jáne olardy saılaýǵa qatysýǵa shaqyrdy», - deıdi dıplomat.
- Respýblıka azamattary ózderiniń saılaý quqyqtaryn júzege asyra alýlary úshin, olarǵa shaqyrýlar taratyldy. Sondaı-aq Ózbekstannyń merzimdik basylymdarynda habarlandyrýlar jasaldy, - dep atap kórsetti Ý.Tórehanov óz suhbatynda.
