Qazaqstannyń óte saýatty, densaýlyǵy myqty jáne mádenıetti azamattaryn dúnıejúzi syılaıtyn bolsa eken dep armandaımyn - Elbasy
ASTANA. Qyrkúıektiń 1-i. QazAqparat /Gúlmıra Álıakparova/ - Búgin, Astanadaǵy «Atameken» Qazaqstan kartasy» - etno-memorıaldyq kesheninde 11 synyp oqýshylary men atalmysh keshenniń patrıottar klýbynyń múshelerimen kezdesken Qazaqstan Prezıdenti Nursultan Nazarbaev, bolashaq urpaq - jastar Qazaqstandy ár ýaqytta basqa eldermen terezesi teń, básekege qabiletti etetindigine úmittenetinin jáne Qazaqstannyń saýatty da mádenıetti, densaýlyqtary myqty jastaryn dúnıejúzi syılaıtyn bolsa eken dep armandaıtynyn aıtty.
«Meniń jáne menimen júrgen azamattardyń, barshamyzdyń búgingi istep jatqan sharýalarymyz senderdiń bolashaqtaryń úshin», - dep atap ótti Elbasy jastarǵa qaratyp aıtqan sózinde.
«Bolashaq baǵdarlamasyn jaqsy bilesizder. Tek qana Astanada 80 mektep jumys isteıdi. Onyń úshten ekisi Astana qurylǵaly salyndy. Onyń 30 mektebi - qazaqsha, sondaı-aq aralas, orys tildi, jekemenshik jáne qazaq-túrik lıtseıleri bar. Onymen birge, halyqaralyq deńgeıdegi úlken ýnıversıtet saldyq (red. - Nazarbaev ýnıversıteti), bıyl ol alǵashqy túlekterin qabyldady. Soǵan túsýge sender umtylýlaryń kerek. Sebebi oǵan túskennen keıin shet elge barýdyń eshqandaı qajeti joq», - dedi N.Nazarbaev.
Prezıdent Astanada boı kótergen atalmysh zamanaýı ýnıversıtet eki eldiń dıplomyn alýǵa múmkin beretinin jáne búgingi kúni Qazaqstan boıynsha salynyp jatqan 20 ıntellektýaldyq mektepke eń qabiletti degender iriktep alynyp, oqytylatynyn qadap aıtty.
«Ár adamnyń qabileti ártúrli bolady. Árkim óziniń jolymen júrip, óz-ózin tabýy tıis. Sondyqtan meniń bar úmitip, bolashaq armanym, sender Qazaqstandy ár ýaqytta basqa eldermen terezesi teń, básekeden qalmaıtyn etip, Qazaqstannyń óte saýatty, densaýlyǵy myqty jáne mádenıetti azamattaryn dúnıejúzi syılaıtyn bolsa eken dep armandaımyn», - dep túıindedi sózin Elbasy.
