Qazaqstannyń ortalyq jáne soltústik óńirlerine tolyqtaı gaz tartýǵa trıllıon teńge qajet
ASTANA. QazAqparat - Parlament Májilisiniń jalpy otyrysynda «2018-2020 jyldarǵa arnalǵan respýblıkalyq bıýdjet týraly» zań jobasyn talqylaý barysynda depýtat Aleksandr Sýslov Úkimet basshysy Baqytjan Saǵyntaevtan Astanaǵa gaz tartý jobasy jaıynda surady, dep habarlaıdy QazAqparat.
«Elimizdiń ortalyq jáne soltústik óńirlerine, onyń ishinde Astanaǵa gaz tartý máselesi sheshilmegen. Osy oraıda Memleket basshysynyń bul baǵyttaǵy tapsyrmasyn oryndaý qaı kezeńde tur», - dep surady A. Sýslov.
Óz kezeginde Baqytjan Saǵyntaev gaz qubyryn tartý jóninde tıisti esepteýler jasalǵanyn, ıaǵnı «Saryarqa» magıstraldi gaz qubyrynyń qurylysy eskerilgenin atap ótti.
«Bul qubyr Qyzylordadan bastalyp, keıin Jezqazǵan, Qaraǵandy, Temirtaý, Astana qalalaryna jalǵasyp, sodan keıin Kókshetaý men Petropavlǵa deıin tartylýy tıis. Tehnıkalyq ekonomıkalyq negizdeme jasalyp, joba quny aıqyndaldy, shamamen 370 mlrd teńge esepteldi. Árıne, bul qomaqty qarjy kólemi. Osy oraıda qarjylandyrý kózin aıqyndaý turǵysynda jumys isteýdemiz. Atalǵan joba birneshe kezeńge bólindi. Birinshi kezeńde Astanaǵa deıin qubyr tartylady, ıaǵnı bul shamamen 1 080 shaqyrymdy quraıdy», - dep túsindirdi Úkimet basshysy.
Onyń sózine qaraǵanda, ekinshi kezeń aıasynda Kókshetaýǵa deıin tartylady, osy oraıda barsha Aqmola oblysyn qamtylady, sonyń ishinde Býrabaı kýrorttyq aımaǵy da eskerilgen. Al úshinshi kezeńde Kókshetaýdan Petropavlǵa deıingi aralyq iske asyrylady.
Bul turǵyda ol gaz qubyry boıynda eldi mekenderge de gazdy taratý jelilerin salý kerektigin, alaıda tehnıkalyq ekonomıkalyq negizdemede taratý jelileri qarastyrylmaǵanyn atap ótti.
«Osy soma óte qomaqty - 670 mlrd. teńgeni quraıdy. Onyń basym bóligin, ıaǵnı 500 mıllıard teńgesi Qaraǵandy oblysyna tıesili. Bul eki jobany biriktirgen kezde trıllıon teńgege (gaz qubyry - 370 mlrd teńge, taratý jelileri - 670 mlrd teńge) jetip otyr. Al eger trıllıon teńgeni tarıfke shaqqanda, gazdyń baǵasy 54-55 teńgege jetedi», - deıdi Saǵyntaev.
Onyń aıtýynsha, búginde 36 teńge somasyndaǵy elimizdegi eń joǵary tarıf Almaty oblysynda tirkelgen
«Erteń munaı men gaz boıynsha vedomstvoaralyq komıssııany ótkizemiz. Energetıka mınıstrligi taǵy bir balamaly usynysty daıyndap jatyr, ıaǵnı Úkimet Memleket basshysynyń tapsyrmasyn oryndaý baǵytynda tıisti sharalardy atqarýda. Jaqyn arada naqty sheshim qabyldanatyny sózsiz», - dedi ol.
