Qazaqstannyń órt sóndirýshileri men qutqarýshylary arasynda úzdikter anyqtaldy
ShYMKENT. QazAqparat - Shymkentte «Órt sóndirýshiler men qutqarýshylardyń sport federatsııasy» qoǵamdyq birlestiginiń kýbogi úshin respýblıkalyq jarys ótti.
Tartysty básekege óńirlerden barlyǵy 20 komanda, 500-den astam adam qatysty, dep habarlaıdy QazAqparat HAA tilshisi.
Respýblıka boıynsha alǵash ret uıymdastyrylǵan sporttyq sharaǵa «Órt sóndirýshiler men qutqarýshylardyń sport federatsııasy» qoǵamdyq birlestigi men Tótenshe jaǵdaılar departamentiniń basshy quramy belsene qatysty. Eptilik pen tózimdilikti qajet etetin sporttyq saıysta sondaı-aq Taraz, Shymkent, Kókshetaý, Qyzylorda qalalaryndaǵy mamandandyrylǵan kolledjderdiń stýdentteri de baqtaryn synady.
Eki kúnge sozylǵan jarys tartysty ótti. Qashanda qyraǵylyǵyn joǵaltpaıtyn batyl da epti órt sóndirýshiler sporttyq jarysta da shapshańdyqtaryn baıqata bildi. Olar jattyǵý munarasynyń joǵarǵy qabattaryna shabýyl satysymen shyǵýdan, júgirýden básekege túsip, órt oryn alǵan jaǵdaıda ózderin qalaı ustaý kerektigin kórsetti.
Jalpy komandalyq esepte erler arasynda birinshi oryndy Astana qalasynyń komandasy jeńip alsa, ekinshi oryn Batys Qazaqstan oblysynyń tótenshe jaǵdaılar qyzmetkerlerine buıyrdy. Úshinshi oryndy Shyǵys Qazaqstan oblysynyń komandasy ıelendi. Al áıelder arasynda birinshi oryndy - Almaty qalasy, ekinshi oryndy - Astana qalasy, úshinshi oryndy Ońtústik Qazaqsta oblysy aldy.
«Órt sóndirý men qutqarýdan sporttyq jarys bizdiń óńirde alǵash ret ótip jatyr. Sporttyq sharaǵa 500-den astam adam qatysýda. Tartysty ótken saıysta barlyq komandalar jaqsy daıyndyqpen kelgenin baıqadyq. Jalpy, sportpen shuǵyldaný qutqarýshyǵa da, órt sóndirýshige de qajet. Biz de únemi qyzmetkerlerimizdiń turaqty túrde sportpen shuǵyldanyp otyrýyna jaǵdaı jasaımyz», - dedi oblystyq Tótenshe jaǵdaılar depatamentiniń bastyǵy Nurbolat Derbisov.
