Qazaqstannyń órt sóndirýshi áıelderi Álem chempıonatynda 3-oryn aldy

SAMARQAND. QazAqparat – QR Tótenshe jaǵdaılar mınıstrliginiń áıelder quramasy órt-sóndirý qutqarý sportynan Álem chempıonatynda – úshinshi, erler quramasy altynshy oryn aldy. QazAqparat bul týraly QR TJM-ǵa silteme jasap habarlaıdy.

29 qyrkúıek pen 5 qazan aralyǵynda Ózbekstannyń Samarqand qalasynda órt-sóndirý qutqarý sportynan erler arasynda XVII Álem chempıonaty jáne órt-sóndirý qutqarý sportynan áıelder arasynda VІII Álem chempıonaty ótti.

Týrnırge erlerden 11 ulttyq qurama, áıelderden 4 komanda qatysty.

Nátıjesinde Qazaqstan áıelder quramasy «jaýyngerlik óristetýden» álem chempıony atandy. Sondaı-aq olar shabýyl satysymen kóterilýden, 100 metrge kedergi jolaǵymen ótýden, jaýyngerlik óristetýden jáne 4-ten 100 metrge deıingi estafetada jarysty.

Jalpy esepte áıelder arasynda birinshi oryndy – Reseı, ekinshi oryndy - Belarýs, úshinshi oryndy Qazaqstan quramasy jeńip aldy.

Erler arasynda birinshi oryn – Belarýs, ekinshi oryn – Reseı, úshinshi oryn Ózbekstan komandasyna buıyrdy. Al Qazaqsta quramasy altynshy orynǵa turaqtady.

Órt sóndirý-qutqarý sportynan kelesi Álem chempıonaty 2023 jyly Túrkııa Respýblıkasynyń Ystanbul qalasynda ótetini josparlanǵan.