Qazaqstannyń ormandy alqaby el aýmaǵynyń nebári 4,6 paıyzyn quraıdy - sarapshy
ASTANA. QazAqparat - Qazaqstannyń ormandy alqaby eldiń barlyq aımaǵynyń 4,6 paıyzyn quraıdy. Bul týraly S.Seıfýllın atyndaǵy QazATÝ-iniń orman resýrstary jáne orman sharýashylyǵy kafedrasynyń meńgerýshisi Danı Sársekova búgin elordada ashylǵan ormandardy qalpyna keltirý jáne qunarlandyrý taqyrybyna arnalǵan halyqaralyq ǵylymı forýmnyń barysynda aıtty.
«Bizdiń elimizdiń aýmaǵy óte úlken, alaıda ormandy alqabymyz nebári sonyń 4,6 paıyzyn quraıdy. Bizdiń klımatymyz ár alýan, topyraq jaǵdaıy da ártúrli, al shól jáne shóleıt jerler Qazaqstannyń 56 paıyzyn alyp jatyr. Bizdiń mindetimiz - ormandy saqtap qalý jáne ony qalpyna keltirý. Jyl saıyn kóshetter otyrǵyzylady, osy jolmen taıaý ýaqytta ormandy tym bolmaǵanda 5 paıyzǵa ulǵaıtpaqpyz. Búginde, ózderińiz bilesizder, Astana aınalasynda «Jasyl beldeý» quryldy. Qazir onyń aýqymy 65 myńnan astam gektardy quraıdy», - dedi ol. Sondaı-aq ol forým qatysýshylary qol jetkizýdi josparlap otyrǵan negizgi maqsattardy atap ótti. «Forýmda ormandy qalpyna keltirý jáne qunarlandyrý týraly pikirler almasylady, sebebi bul másele Qazaqstanda ǵana emes, shóleıt aımaqtarda ornalasqan álemniń barsha memleketterinde ózekti máselege aınalǵan. Olardy qalpyna keltirýdiń qandaı da bir ortaq ádisin tabamyz dep senemin», - dep sózin túıindedi Sársekova. Halyqaralyq ǵylymı forým Qazaq agrotehnıkalyq ýnıversıtetinde ótýde. Onyń jumysyna Qazaqstannyń aýyl sharýashylyǵy, bilim jáne ǵylym mınıstrlikteriniń ókilderi, álemniń 20-ǵa jýyq elinen orman sharýashylyǵy salasyndaǵy jetekshi JOO-larynyń jáne uıymdarynyń mamandary qatysýda.
