Qazaqstannyń orman alqaptary 10 jylda 24 myń gektarǵa ulǵaıdy
Bul týraly búgin QR Parlamenti Májilisinde ótip jatqan «Ósimdikter men janýarlar dúnıesin qorǵaýdyń, ósimin molaıtýdyń jáne olardyń obektilerin ornyqty paıdalanýdyń ózekti máseleleri» taqyrybynda ótip jatqan «dóńgelek ústel» barysynda QR Aýyl sharýashylyǵy vıtse-mınıstri Erlan Nysanbaev málim etti, dep habarlaıdy QazAqparat.
«Qazaqstan ormany az memleketter qataryna jatatyndyǵy belgili. Ormandy alqaptar eldiń 4,6 paıyzyn ǵana alyp jatyr. Sondyqtan ekpelerdi kóbeıtý mınıstrliktiń negizgi mindetteriniń biri bolyp otyr. Osy oraıda jergilikti ákimdikter bekitken josparǵa sáıkes óńirlerde jasyl aımaqtardy qurý, eldi mekenderdi kógaldandyrý jumystary júrgizilýde. Osynaý mańyzdy jumystardy atqarý úshin ár óńir boıynsha 5 jyldyq jospar jasalyp, bekitildi. Aıta ketý kerek, bul jumys bıylǵy jylǵa deıin júıeli júrgizilmegen bolatyn. Degenmen, sońǵy 10 jylda 2005 jylǵy 31 myńnan aǵymdaǵy jyly 55 myń gektarǵa deıin ulǵaıdy», - dep atap ótti vıtse-mınıstr.
Bul rette ol Elbasy tapsyrmasyna sáıkes Astana mańynda jasyl jelek qurý jumystarynyń qarqyndy júrgizilip jatqanyn basa aıtty. Búginde bul aımaqtyń kólemi 75 myń gektarǵa jetken.
«Orman salasyn qoldaý men saýyqtyrý boıynsha birqatar sheshim qabyldandy. Olardyń bastylary mynalar: jumyr aǵash materıaldarynyń eksportyna tyıym salý, sekseýil ormandaryndaǵy aǵan kesýdiń barlyq túrine moratorıı jarııalaý. Qylqan japyraqty ormandarda sanıtarlyq maqsatta jáne órtengen orman aǵashtaryn kesýge tyıym salý máselesi qarastyrylýda. Sonymen qatar tabıǵı qaldyqtardy da qoldanýǵa tyıym salyndy. Saýda oryndary men janarmaı quıý beketterinde sekseýil satýǵa tyıym salý jónindegi sharalar qoldanylýda», - dedi Nysanbaev.
Sonymen qatar vıtse-mınıstr Qazaqstanda orman alqaptaryn ulǵaıtýǵa múmkinshilik jasaý maqsatynda orman paıdalaný jáne ormandardy molyqtyrý máselelerin damytý, jeke orman ósirý ınstıtýtyn, aǵashtuqymdastaryn óndiristik jáne energetıkalyq maqsatta plantatsııalyq ósirýdi damytý kózdelip otyrǵanyn basa aıtty.