Qazaqstannyń optıkalyq qurylǵylary eksportqa shyǵarylyp jatyr - Beıbit Atamqulov
ASTANA. QazAqparat - «Qazaqstan Aselsan Injınırıng» kompanııasy otandyq optıkalyq qurylǵylardy eksportqa shyǵara bastady. Bul týraly Parlament Májilisindegi Úkimet saǵatynda Qorǵanys jáne aeroǵarysh ónerkásibi mınıstri Beıbit Atamqulov málim etti, dep habarlaıdy QazAqparat tilshisi.
«Tehnologııa transfertin qamtamasyz etýmen birqatar birlesken óndirister tabysty jumys isteýde. Osy oraıda elektrondy-optıkalyq qurylǵylardy shyǵaryp jatqan «Qazaqstan Aselsan Injınırıng» (KAE) JShS ónimderi suranysqa ıe. 2014 jyly iske qosylǵan kásiporyn 25 mlrd teńgeden astam somaǵa 12 myńnan astam ónimdi elimizdiń túrli vedomstvolaryna jetkizdi. Bul turǵyda kúsh qurylymdar bólimsheri túngi kórý qurylǵylarymen jáne basqa ónimderimen tolyqtaı qamtamasyz etildi», - dedi mınıstr.
Onyń sózine qaraǵanda, byltyr kompanııa óz ónimderin shetelge eksportqa shyǵara bastady. 2017 jyldyń eksporty eki mlrd teńgege jetti.
Elektrondy-optıkalyq qurylǵylar shyǵaratyn bul óndiristiń ónimderi búginde joǵary suranysqa ıe. Onda qazirgi kezde kózdeýishter, monokýlıarlar, túnde kórý bınokýlıarlary; jylýbeıne kózdeýishteri; barlaý jáne radıobaılanys quraldary; jer betindegi nysanalarǵa jaryq túsirýge arnalǵan yqsham lazerli keshenderi; qashyqtyqtan basqarylatyn áskerı modýlderi; ınfraqyzyl lınzalar jáne elektrondy platalar óndiriledi.
Budan bólek Atamqulov «Qazaqstan Paramaýnt Injınırıng» kompanııasynyń jaýyngerlik dóńgelekti mashınalaryn shyǵarý jumystaryna toqtaldy.
Aıta keteıik, bul zaýyt Ortalyq Azııadaǵy zamanaýı brondy dóńgelekti mashına shyǵaratyn eń iri kásiporyn. Kásiporyn brondy tehnıkanyń tómendegi túrlerin shyǵarady: 4h4 dóńgelekti formýlasyndaǵy «Arlan» BDM; - 4h4 dóńgelekti formýlasyndaǵy «Alan» BDM; - 6h6, sondaı-aq 8h8 dóńgelekti formýlasyndaǵy «Barys» BTR-ler.
8h8 dóńgelekti formýlasyndaǵy «Barys» BTR-leri 2016 jylǵy KADEX-ten keıin aýqymdy synaqpen qamtyldy. Qorǵanys mınıstrliginiń eskertpelerinen keıin mashına jetildirilip, bıyl áskerı tehnıka qys mezgilindegi ekstremaldy tabıǵı-klımattyq synaqtardan sátti ótti. Aldaǵy ýaqytta endi jazǵy synaqtar uıymdastyrylady.
