Qazaqstannyń opera ánshileri eski ári súıikti fılmderdiń áýenderin oryndaıdy
ASTANA. QazAqparat - 8 sáýir kúni «Astana Opera» teatrynda «Ekran áýenderi: qaıta júkteý» kontserti ótedi, dep habarlaıdy QazAqparat.
Úsh jyl qatarynan ótkizilip kele jatqan kontserttiń bıylǵy baǵdarlamasy tolyq jańartylǵan. Kórermen nazaryna «Meniń atym Qoja», «Qyz Jibek», «Taqııaly perishte», «Adamdar arasyndaǵy bóltirik», «Ivan Vasılevıch mamandyǵyn aýystyrady», «Qyzdar», «Adam-amfıbııa», «Úlken úzilis», «Taǵdyr tálkegi nemese jeńil býyńyzben», «Ine», «Brıgada» jáne t. b. kınofılmderden kompozıtsııalar beıneúzindisimen usynylatyn bolady.
«Turaqty tyńdarmandarymyzdyń baryna óte qýanyshtymyn, olar bizdi asyǵa kútedi. Adamdar kúndelikti qarbalysty umytyp, kontsertimizde emin-erkin demalǵanyn, al eski fılmderdiń áýenderi olardyń esindegi eń jarqyn sátterdi oıatqanyn, jaqsy kóńil-kúı syılaǵanyn qalaımyn. Baǵdarlamaǵa engen barlyq shyǵarma klassıkalyq nusqada oryndalady, olardy ózim óńdedim. Dombyra, qobyz, sybyzǵy sııaqty ulttyq aspaptardy paıdalanamyz, sondaı-aq keıbir zamanaýı kompozıtsııalardy oryndaý úshin elektrli gıtara qoldanamyz, - dep atap ótti kontsert avtory Álıhan Ydyrysov.
Tanymal jáne kópshiliktiń súıikti kınofılmderiniń kompozıtsııalaryn Qazaqstannyń eńbek sińirgen qaıratkerleri Súndet Baıǵojın jáne Jan Tápın, sonymen qatar Tatıana Vıtsınskaıa, Ramzat Balakıshıev, Saltanat Bekmaǵanbetova, Eltaı Mustanov, Qazybek Dosmuhambetov, Aleksandr Krasıkov, Erjan Saıypov jáne t.b. solıster oryndaıdy.
Kontsertke qatysatyn teatr ujymy - «Astana Opera» teatrynyń Kameralyq orkestri, Kameralyq hory, erler hory men balalar hory, bas hormeıster - Qazaqstannyń eńbek sińirgen qaıratkeri Erjan Dáýitov. Rejısseri - Natalıa Kagadıı.
