Qazaqstannyń ońtústik-shyǵysynda nóserli jańbyr, burshaq jaýýy yqtımal - 18 maýsymǵa arnalǵan aýa raıy boljamy
ASTANA. 17 maýsym. QazAqparat - 18 maýsym kúni Qazaqstannyń basym bóliginde aýa raıy jaýyn-shashynsyz bolady, keı jerlerde qatty jel bolýy múmkin. Al batysta shań kóterilip, daýyl soǵýy yqtımal, dep habarlaıdy Qazgıdrometke silteme jasap TJM baspasóz qyzmetinen.
Elimizdiń shyǵys aýmaǵynda atmosferalyq aǵyndar áserinen kún kúrkirep, jaýyn jaýýy múmkin, al ońtústik-shyǵysta nóserli jańbyr, burshaq kútiledi.
Almaty, Jambyl, Ońtústik Qazaqstan, Atyraý, Batys Qazaqstan, Shyǵys Qazaqstan oblystarynda 15-20 m/s-qa deıin jel kúsheıedi, Atyraý, Batys Qazaqstan oblystarynda shań kóterilip, daýyl soǵady.
Atyraý oblysynda, Mańǵystaý, Batys Qazaqstan Aqtóbe oblystarynyń birqatar aımaqtarynda kún aptap ystyq bolady.
Respýblıkanyń soltústik-batysy men ońtústiginde, ortalyǵy men shyǵysynda tótenshe órt qaýpi saqtalady.
Taıaý kúnderi Qazaqstannyń ońtústik jáne shyǵysyndaǵy taýly ózenderinde sý deńgeıiniń aýytqýy yqtımal. Qatty jaýyn-shashynnyń saldarynan Almaty oblysynyń keıbir kishigirim taý ózenderi tasýy múmkin. Qazaqstannyń qalǵan sýly nysandarynda gıdrologııalyq rejimde aıtarlyqtaı ózgerister bolmaıdy dep kútilýde.
