Qazaqstannyń ońtústik óńirlerindegi áskerlerde jaýyngerlik ázirlikti kenetten tekserý bastaldy
Tekserý barysynda «Ońtústik» óńirlik qolbasshylyǵynyń áskerleri, Aeroutqyr áskerler men QR QK Áýe qorǵanysy kúshteri dabyl boıynsha kóterilip, josparlanbaǵan aýdandarǵa shyǵaryldy. Barlyǵy bul is-qımyldarǵa 3 myńnan astam adam, 400 birlik áskerı tehnıka jáne 36 avıatsııalyq tehnıka qatysty.
Áskerlerdegi manevrlerdi QR Qorǵanys mınıstri jáne Bas shtabtyń ókilderi baqylady. Jasalǵan ekikúndik tekserý barysynda quramalardyń utqyrlyǵy jáne olardyń alys qashyqtyqtarǵa kúshterdi jedel jetkizýge qabilettiligi tekserildi. Polıgondarda atys jáne taktıkalyq-arnaıy mindetterdi pysyqtaý júrgizildi. Bul is-sharalar komandırler men shtabtardyń jaýyngerlik ázirliktiń joǵary deńgeılerine keltirý, shoǵyrlaný aýdanyna shyǵý kezindegi is-qımyldaryna baǵa berý úshin ótkizilip otyr. Sondaı-aq, bul áskerlerdi jedel óristetken jáne jaýyngerlik daıarlyq jospary boıynsha qoldanǵan jaǵdaıdaǵy materıaldyq-tehnıkalyq quraldardyń jaı-kúıin, jetkilikti bar bolýyn jáne muqtajdyǵyn aıqyndaý úshin qajet. «Qorǵanys mınıstrligi Joǵarǵy Bas Qolbasshynyń tapsyrmasy boıynsha kútpegen tekserýlerge negizdelgen túrli is-sharalardyń úlken keshenin ótkizedi. Jospardan tys tekserýler búgingi tańda armııanyń jaýyngerlik ázirligin tekserýdiń eń tıimdi ádisi bolyp otyr», - dep túsindirdi QR Qorǵanys mınıstri I.Tasmaǵambetov. «Qarýly Kúshterdi osylaısha tekserýdiń qorytyndysy retinde jedel jınalys ótkizilip, onda bólimder men quramalar jaýyngerlik ázirliginiń negizgi nátıjeleri baıandaldy. QR Qarýly Kúshteri Joǵarǵy Bas Qolbasshysynyń tapsyrmasyna sáıkes, oqý-jattyǵýdyń jalpy taldaýy men qorytyndysyn Bas shtab Qorǵanys mınıstrliginiń alqasynda baıandaıtyn bolady», delingen habarlamada.