Qazaqstannyń Ońtústik Koreıadaǵy konsýldyq esebine tirkelýshiler sany kúrt ósti – SІM

NUR-SULTAN. QazAqparat – Qazaqstannyń Ońtústik Koreıadaǵy konsýldyq bóliminiń esebine tirkelýshi otandastarymyzdyń sany kúrt ósip otyr, dep habarlaıdy QazAqparat tilshisi.

«Ońtústik Koreıadaǵy konsýldyq esepke turyp jatqan qazaqstandyqtardyń sany kúrt ósip keledi. Óıtkeni 1 naýryzdan bastap Nur-Sultan – Seýl jáne Almaty – Seýl baǵyttary boıynsha turaqty reısterdiń sany aptasyna 9-dan 3-ke deıin azaıǵan bolatyn. Sondyqtan ol jaqtaǵy otandastarymyz keleshekte shyǵa almaı qalmaımyz ba dep qorqyp, ózderiniń sonda júrgenin bildirip jatyr. Biz ol jaqta qansha otandasymyz baryna, ne istep jatqanyna esep júrgizý ústindemiz», - dedi Aıbek Smadııarov QazAqparat tilshisiniń suraǵyna jaýap bere otyryp.

Syrtqy ister mınıstrliginiń resmı ókiliniń aıtýynsha, qazirgi tańda Ońtústik Koreıa aýmaǵynda Qazaqstannyń 35 myńǵa tarta azamaty júr.

«Ótken aptada olardyń 800-i konsýldyq esepte tursa, búgingi kúni esepke tirkelgenderdiń sany 1500-ge jetti. 35 myń qazaqstandyqtyń shamamen 12 myńy ol jaqta zańsyz júrgender», - dedi ol.

Eske sala ketsek QR Indýstrııa jáne ınfraqurylymdyq damý vıtse-mınıstri Berik Kamalıev keshegi Úkimet otyrysynda 1 naýryzdan bastap Nur-Sultan – Seýl jáne Almaty – Seýl baǵyttary boıynsha turaqty reısterdiń sany aptasyna 9-dan 3-ke deıin qysqarǵanyn málim etken edi.

Al Premer-Mınıstrdiń orynbasary Eraly Toǵjanov Qytaı men Iran baǵytyndaǵy áýe reısteri toqtatylǵanymen, nelikten Ońtústik Koreıa baǵytynda tek shektelgenin túsindirip berdi.