Qazaqstannyń ońtústigindegi transheıalarda jabaıy ańdar qyrylyp jatyr
TÚRKІSTAN. QazAqparat – Túrkistan oblysyndaǵy ferma sharýashylyqtarynyń aýmaǵyndaǵy transheıalarda jabaıy ańdardyń qyrylyp jatqany anyqtaldy. Bul týraly QazAqparat Qazaqstannyń bıoalýandylyqty saqtaý (QBASQ) qaýymdastyǵyna silteme jasap habarlaıdy.
«2021 jyldyń 20 mamyrynda «SOS Djeıran» jobasy boıynsha QBASQ ekspedıtsııasyna qatysqan sarapshylar toby monıtorıng barysynda Saryaǵash pen Shardara aýdandarynyń aralyǵynda jańa transheıalardy baıqaǵan. Transheıanyń túbinde júzdegen baýyrymen jorǵalaýshylar men qosmekendiler jatqan. Olardyń arasynda ásirese ortaazııalyq tasbaqalar kóp bolatyn. Tereńdigi eki metr bolatyn shuńqyrlar janýarlardyń qyrylýyna sebep bolýy múmkin.
Osy kúni biz Túrkistan oblys ákiminiń orynbasary Sáken Qalqamanovpen habarlasyp, ol 21 mamyr kúni Saryaǵash aýdandyq ákimdiginiń ákimshiligin oqıǵa ornyna barýǵa yqpal etti»,-dep habarlady QBASQ baspasóz qyzmeti.
Uıymnyń málimetinshe, bul másele 2019 jyly kóterilgen bolatyn. Ol kezde Zýkkov qorynyń «Ortalyq Azııa shólderi bastamasy» jobasynyń granty aıasynda uıymdastyrylǵan ekspedıtsııa barysynda ǵalymdar ferma sharýashylyǵynyń mańynda jańa qazylǵan shuńqyrlardy baıqaǵan jáne onyń túbinde 365 baýyrymen jorǵalaýshylar men qosmekendiler bolǵan. Olardyń arasynda tabıǵatta sırek kezdesetin túrleri de bar.
Onda shuńqyrdaǵy janýarlardyń barlyǵy bosatylǵan bolatyn. Alaıda sol ýaqytta-aq baýyrymen jorǵalaýshylardyń 16% ystyq pen sýdyń jetispeýshiliginen ólip qalǵan. Qalǵan janýarlar da ólýge shaq qalǵan, álsiz edi.
Uzyndyǵy 1 km bolatyn osyǵan uqsas taǵy bir transheıada baýyrymen jorǵalaýshynyń birneshe túri men 2 qozy, 2 laq boldy. Olar da ózderi shuńqyrdan shyǵa almaı, ózgelerdiń kómeginsiz ólip qalar edi.
Fermelerdiń aıtýynsha, egis alańdaryn ajyratý tájirıbesi óńirde keńinen qoldanylady.
«Alaıda bul tásil kóptegen baýyrymen jorǵalaýshylar men qosmekendilerdiń qyrylýyna yqpal etedi. Bul árıne, zańsyz. Óıtkeni janýarlardyń arasynda erekshe qorǵaýǵa alynǵan nemese «Qyzyl kitapqa» engizilgenderi de bar.
Sol sebepti bul másele shuǵyl sharalar qabyldap, sheshýdi talap etedi.
2019-2020 jyldary QBASQ pen Bilim jáne ǵylym mınıstrliginiń Zoologııa ınsttýty oblystyq jáne respýblıkalyq quzyrly organdarǵa resmı ótinish jasaǵan bolatyn»,-delingen habarlamada.
