Qazaqstannyń ońtústiginde, shyǵysy men batysynda sý tasqyny bolýy yqtımal
ASTANA. QazAqparat - «Qazgıdromet» RMK Qazaqstannyń ońtústik, shyǵys jáne batys óńirlerinde jaýǵan jańbyr sý tasqyndaryna sebepshi bolýy múmkin ekenin eskertedi, dep habarlaıdy QazAqparat.
Sınoptıkterdiń aıtýynsha, 7-9 naýryz kúnderi Almaty, Jambyl, Ońtústik Qazaqstan jáne Shyǵys Qazaqstan oblystarynda jaýyn-shashyn bolyp, keı jerlerde jańbyr kúsheıe túsedi, sonyń saldarynan ózenderdiń arnasyndaǵy muz jarylyp, seń júrýi, taýly aımaqtarda qardyń erýi saldarynan ózenderdiń arnasynan tasýy múmkin.
Spýtnıkten túsirilgen sýretterge qaraǵanda, 5 naýryzda Almaty oblysynda qary ketpegen aýmaq 28%-dy, Jambyl oblysynda 5%, Ońtústik Qazaqstan oblysynda 3% jáne Shyǵys Qazaqstan oblysynda 89%-dy quraıdy.
8-9 naýryzda Qyzylorda, Atyraý, Batys Qazaqstan, Qostanaı jáne Qaraǵandy oblystarynda kún jylynyp, kúndiz aýa temperatýrasy 3-8 gradýsqa deıin kóterilýi múmkin. Qar aralas jaýǵan jańbyr qardyń jyldam erýine sebep bolady.
Qyzylorda oblysynda qar ketpegen aýmaq 47%-dy quraıdy, Atyraý oblysynyń 59%, Batys Qazaqstan oblysynyń 98%, Aqtóbe oblysynyń 99%, Qostanaı oblysynyń 98%, Qaraǵandy oblysynyń 93% aýmaǵy áli qar astynda jatyr.
