Qazaqstannyń ońtústiginde eki ósim núktesi qurylady - Májilis depýtaty
«Qazaqstannyń ońtústiginde eki ósim núktesi qurylady. Shymkentke respýblıkalyq mańyzy bar qala mártebesin berý jáne Túrkistan oblysyn qurý tek Qazaqstannyń ǵana emes, sonymen birge Ortalyq Azııa óńiriniń ekonomıkalyq múddesi úshin jumys isteýge múmkindik beredi. Eger biz Shymkent pen jańadan qurylǵan Túrkistan oblysynyń áleýetin qarastyratyn bolsaq, neni baıqaımyz? Birinshiden, Shymkentte jáne oblysta óte iri ónerkásip jáne bilim berý nysandary shoǵyrlanǵan. 90-shy jyldary Memleket basshysynyń bastamasymen Túrkistanda Halyqaralyq qazaq-túrik ýnıversıtetiniń qurylǵanyn eske alsaq ta jetkilikti. Búginde bul ýnıversıtet Qazaqstannyń joǵary oqý oryndary reıtınginde laıyqty orynǵa ıe bolyp otyr. Kóptegen stýdentter, onyń ishinde sheteldikter de bilim alyp jatyr», - dedi Muhtar Erman.
Sonymen qatar Májilis depýtaty Ońtústik Qazaqstan oblysynyń aýmaǵy arqyly ótetin «Batys Eýropa - Batys Qytaı» jańa zamanaýı dálizi salynǵanyn eske salyp ótti. Buǵan qosa, gaz tartý máselesi de sheshilip, óńirde aýyl sharýashyly, shaǵyn bıznes qarqyndy damı túsýde.
Onyń atap ótýinshe, Parlament jańa Túrkistan oblysynyń qurylýyna baılanysty belgili bir jumystardy ótkizetin bolady. Jalpy, depýtattar Prezıdenttiń bul sheshimin biraýyzdan qoldady jáne joǵary baǵa berdi. Qazirgi ýaqytta Túrkistanda túrli nysandar salý boıynsha jospar ázirlenýde.