Qazaqstannyń ońtústiginde egis naýqany bastaldy
Oblys ákimderiniń aýyl sharýashylyǵy basqarmalarynyń aldyn ala aqparatyna sáıkes, 2019 jyly jalpy aýmaǵy 22,3 mln gektar aýmaqqa egin salý kózdelgen. Bul ótken jylǵa qaraǵanda 290,7 myń gektarǵa artyq.
«1 sáýirdegi jaǵdaı boıynsha joǵaryda atalǵan oblystarda 379,3 myń gektar aýmaqqa aýyl sharýashylyǵy daqyldary egilip qoıǵan. Odan bólek, masaqty daqyldar 196,6 myń gektarǵa, maıly daqyldar 52,7 myń gektar jerge, kópjyldyq shópter 72,3 myń gektarǵa, kókónis-jemis daqyldary men kartop 57,4 myń gektarǵa, qant qyzylshasy 0,3 myń gektarǵa egildi», - dedi QR Aýyl sharýashylyǵy mınıstrligi Ósimdik sharýashylyǵy ónimderin óndirý jáne qaıta óńdeý departamentiniń basshysy Aqbar Máýlenov.
Aqbar Máýlenov Túrkistan oblysynda bos jerlerdi ıgerý esebinen maıly, dándi daqyldar, jemshópter, burshaq daqyldary, azyq-túlik daqyldary sııaqty suranysqa ıe daqyldar alqabyn tıimdi ártaraptandyrý júzege asyrylyp jatqanyn atap ótti. Onyń aqparatyna qulaq assaq, ótken jylǵa qaraǵanda, arpa men júgeri egilgen alqap 57,2 myń gektarǵa, qant qyzylshasy egiletin aýmaq 2,6 myń gektarǵa, jem-shóp alqaby 654,1 myń gektarǵa artady.
«Jalpy, respýblıkanyń agroónerkásiptik kesheninde qazirgi tańda 147 myń traktor, 3,9 myń joǵary ónimdi egis kesheni, 79,4 myń sepkish pen 249,0 myń topyraq óńdeıtin qural bar. Kóktemgi egis naýqanyn júrgizý úshin traktorlardyń daıyndyǵy 91 paıyzdy, egis keshenderiniń daıyndyǵy 100 paıyzdy, sepkishterdiń daıarlyǵy 91 paıyzdy quraıdy», - dedi ol.
Eske sala ketsek, bıylǵy egin salý jumystaryna 380 myń tonna janar-jaǵarmaı bólinip otyr.