Qazaqstannyń onkologııa qyzmeti TMD elderiniń aldynda keledi - M.Davydov
ASTANA. 8 qyrkúıek. QazAqparat - Qazaqstannyń onkologııalyq qyzmeti TMD elderiniń arasynda alda keledi, dep habarlady TMD onkologtary qaýymdastyǵynyń prezıdenti Mıhaıl Davydov pm.kz saıtyna bergen suhbatynda.
«TMD-nyń kóptegen elderinde Qazaqstandaǵydaı jaǵdaı joq. Keıbir elderdiń qarjylyq-ekonomıkalyq dármensizdigi onkologııa problemalaryn jaba almaı otyr. Oǵan qosa, onkologııanyń aldynda turǵan mindetterdiń mańyzyn tereń túsinbeýshilik te bar. Sondyqtan da TMD-nyń keıbir elderi bul máselede Qazaqstannan artta qalyp qoıǵan. Meniń oıymsha, onkologııamen kúresý máselesinde Qazaqstan aldyńǵy qatarda», - deıdi Mıhaıl Davydov.
Qaýymdastyq basshysynyń aıtýynsha, skrıngtik baǵdarlamalardy uıymdastyrý onkologııalyq aýrýhanalardaǵy em-domnyń tıimdiligin túbegeıli arttyrýǵa múmkindik beretin bolady.
«Al bul baǵdarlamalarǵa memleket tarapynan qoldaýdyń kórsetilýi eldiń barlyq onkologııalyq qyzmetin ózgerte alady. Ol úshin barlyq jaǵdaı jasalǵan - materıaldyq-tehnıkalyq bazalar jańartylyp, jańa tehnologııalar ákelinýde, jańa oqý mekemeleri salynýda», - dedi ol.
