Qazaqstannyń óńirleri Túrkistanǵa bir ǵımarattan salyp beredi
TÚRKІSTAN. QazAqparat - Elbasy tapsyrmasynyń aıasynda respýblıkanyń árbir oblysy Túrkistan qalasyna bir ǵımarattan syıǵa tartady. Bul týraly oblys ákimi Janseıit Túımebaev Túrkistan qalasyn túrki áleminiń rýhanı-mádenı ortalyǵy retinde damytý boıynsha ótken jıynda aıtty.
Máselen, Astana qalasynyń ákimi Áset Isekeshov «Astana» saıabaǵyn salý týraly usynys bildirgen, dep habarlaıdy QazAqparat tilshisi.
Jıynda Janseıit Túımebaev 1500 jyldan astam tarıhy bar Túrkistannyń ótkeninen az-kem syr shertti. Qazaq handyǵynyń astanasy bolǵan bul meken búkil túrki áleminiń de rýhanı-mádenı astanasy bola bilgenin jetkizdi. Sonymen qatar, atalǵan tarıhı shahardy Elbasynyń tapsyrmasyna sáıkes, Qazaqstannyń Rýhanı ortalyǵy baǵytynda jandandyrý jaıyna toqtaldy.
«Túrkistan qalasynda boı kóteretin turǵyn úıler kóp qabatty bolmaıdy. Sebebi, Qoja Ahmet ıAssaýı kesenesiniń bıiktiginen aspaý kerek. Barlyq jerde mavzoleı múmkindiginshe kórinip turýy qajet. Sondaı-aq, baspanalar Orta-Azııalyq stılde, ıaǵnı kóne dáýirdegi sáýletpen salynýy tıis. Sonda elimizdegi, kem degende, bir qala osyndaı eski kelbetpen boı kóteredi»,-dedi Janseıit Túımebaev.
Túrkistan qalasyn týrıster úshin qolaıly aımaqqa aınaldyrý máselesin sóz etken óńir basshysy munda jańadan áýejaı, temirjol vokzaly men avtovokzal jáne qonaqúıler, dámhanalar salynatynyn atap ótti.
Budan bólek, ákim Q.A. ıAssaýıǵa qatysty jarııalanǵan qundy jádigerlerdiń kóptiginen arnaıy ıAssaýı mýzeıi salyný qajettigine de toqtaldy.
