Qazaqstannyń ónimderi iri partııamen shetelge jiberiledi - AShM
ASTANA. QazAqparat - QR Aýyl sharýashylyǵy vıtse-mınıstri Gúlmıra Isaeva Qazaqstandaǵy shet memleketterdiń elshilerine agroónerkásip keshenin damytýdyń jańa baǵdarlamasy jaıynda aıtyp berdi, dep xabarlaıdy QazAqparat tilshisi.
Óz sózinde vıtse-mınıstr kooperatıvterdi kóptep qurý, maıly daqyldar alqaptaryn keńeıtý, agroxımııa men tyńaıtqyshtar salasyn damytý jaıynda aıta kele, aldaǵy ýaqytta memlekettik sýbsıdııalardy alatyndardyń kóbeıetinin jetkizdi. Sondaı-aq ol qazirdiń ózinde aýyl sharýashylyǵy ónim óndirýshileri úshin nesıe stavkasynyń tómendetilgenin taǵy bir márte eske saldy. "Al Qazaqstannyń eksporttyq áleýetin ósirý úshin Azyq-túlik kelisimshart korporatsııasy negizinde eksport ortalyǵy qurylyp jatyr. Atalǵan qurylym aýyl sharýashylyǵy ónimderin shetelge shyǵarýmen aınalysady. Osy oraıda ortalyq mamandary eksporttyq arnalardy anyqtap, ónimdi ótkizýdiń naqty naryqtaryn belgileıtin bolady. Budan bólek, kásipkerlerge konsýltatsııa beriledi jáne kelisimderge quqyqtyq qoldaý jasalady. Aldaǵy sharalar bunymen shektelmeıdi. Ónim óndirýshilerdiń taýarlary kóptep satyp alynyp, iri eksporttyq partııalar jasaqtalady", - deıdi Isaeva.
Sondaı-aq vıtse-mınıstr ınvestorlardyń quqyqtaryn qorǵalatynyn, salyq jaǵynan san alýan jeńildikter men preferentsııalardyń beriletinin jetkizdi. Al QR Premer-Mınıstriniń orynbasary - aýyl sharýashylyǵy mınıstri Asqar Myrzaxmetov dıplomattardyń barlyq suraqtaryna jaýap berip, Qazaqstannyń aýyl sharýashylyǵy salasynda kásipkerlik úshin jasalatyn tıimdi jaǵdaılar jaıynda sheteldiń bıznesmenderine keńinen jetkizýdi surady.
Aıta keteıik, kezdesýdi ashqan QR Syrtqy ister mınıstri Qaırat Ábdiraxmanov Túrkimenstan prezıdentiniń Qazaqstanǵa memlekettik saparmen keletinin málimdedi.
