Qazaqstannyń óner juldyzdary Han Táńiri shyńyna shyqty
TALDYQORǴAN. QazAqparat - Qazaqstandyq teatr jáne kıno salasynyń ókilderi Ánýar Nurpeıisov pen Aısulý Ázimbaeva Han Táńiri shyńynan oraldy. Olar qyzyǵynan qıyndyǵy kóp sapary jaıly baspasóz máslıhatynda aıtyp berdi, dep habarlaıdy QazAqparat tilshisi.
Eki aptaǵa sozylǵan medıaekspedıtsııaǵa akterlardan bólek «Jetisý» geografııalyq qaýymdastyǵynyń jetekshisi Ánýar Demegenov pen ári sportshy, ári operator Aleksandr Kýznetsov qatysty.
Akter Ánýar Nurpeıisov tilshilerge bergen suhbatynda Han Táńiri shyńyna kóterilý ómir men ólim arasyndaǵy arpalys dep baǵalady. Talantty juldyz teńiz deńgeıinen 4 myń metr bıiktikten asqan kezde ómirdi qadirleýdi úırengenin jasyrmady.
Al Aısulý Ázimbaeva elimizdegi eń bıik shyńdy baǵyndyrý bul úlken ǵylym dep baǵalady.
«Kez kelgen adam ıyǵyna 15-20 kg júkti asyna salyp taýǵa shyǵa almaıdy. Ol úshin uzaq fızıkalyq jáne júıke daıyndyǵy qajet deıdi», - deıdi Aısulý Ázimbaeva.
Bul saparynda Ánýar Nurpeıisov 5400 metr bıiktikti mise tutsa, názik jandy Aısulý 6 myń metr bıiktikke kóterile alǵan. Aýa raıy oıdaǵydaı bolsa da, shyńnyń eń bıik núktesine jetýge medıaekspedıtsııadaǵy eshkimniń shamasy jete qoımaǵan. Olar onyń sebebi daıyndyqta dep túsindirdi. Sebebi kásibı alpınıster mundaı bıiktikterge jyldar boıy daıyndalyp kóteriledi. Al bizge ýaqyt tyǵyz boldy, deıdi ekspedıtsııa músheleri. Degenmen, bolashaqta joba jalǵasyp jatsa, táýekel dep taǵy bir múmkindikterin synap kórýge daıyn ekendikterin jetkizdi.
20 gradýs sýyqta túnep, qar kóshkinderin óz kózderimen kórgen óner ıeleri bul sapary jaıynda derekti fılm shyǵarýdy josparlap otyr.
