Qazaqstannyń óńdeýshi sektoryna tikeleı ınvestıtsııalar 90 paıyzdan astam kórsetkishke artty

ASTANA. QazAqparat - Keden odaǵy qurylǵaly beri Qazaqstannyń óńdeýshi sektoryna sheteldik tikeleı ınvestıtsııalar 90 paıyzdan astam kórsetkishke artty. Bul týraly búgin Ortalyq kommýnıkatsııalar qyzmetindegi brıfıngte QR Ekonomıka jáne bıýdjettik josparlaý mınıstrligi Halyqaralyq ekonomıkalyq ıntegratsııa departamentiniń dırektory Ernar Bakenov málim etti.

«Keden odaǵy qurylǵaly beri Qazaqstannyń óńdeýshi sektoryna sheteldik tikeleı ınvestıtsııalar 90 paıyzdan astam kórsetkishke artty. Sonymen qatar atalǵan merzimde ekonomıkaǵa baǵyttalǵan sheteldik tikeleı ınvestıtsııalardyń jalpy kólemi 34 paıyzǵa ǵana ósti», - dedi departament basshysy. Osy oraıda ol ıntegratsııalyq múmkindikter elimizge jańa múmkindikterdi ashyp otyrǵandyǵyn atap ótti. «Bul faktiler ekonomıkany ındýstrııalandyrý men shaǵyn jáne orta bıznesti qoldaý boıynsha Úkimet tarapynan atqarylyp jatqan keshendi sharalardyń nátıjesi», - dep toqtaldy E.Bakenov. Aıta keteıik, 2013 jyly Qazaqstanǵa tartylǵan jalpy tikeleı sheteldik ınvestıtsııa 24,1 mlrd. AQSh dollaryn qamtydy.