Qazaqstannyń ókili Ózbekstanmen birlesken «Syrdarııa» sharýashylyǵyna rotatsııalanady
Redaktsııa saýalyna bergen jaýapta Ekologııa, geologııa jáne tabıǵı resrýstar mınıstrligi bul málimette rastady.
«2018 jyly Túrkmenbashy qalasynda ótken Halyqarylyq Araldy qutqarý qorynyń Sammıtinde Prezıdentter kótergen bastamalardy oryndaý maqsatynda HAQQ atqarýshy komıteti HAQQ ınstıtýtsıonaldyq-quqyqtyq bazasyn jetildirý jónindegi óńirlik jumys tobyn qurdy. Jumys tobynyń sheńberinde qazaqstandyq tarap «Syrdarııa» jáne «Ámýdarııa» basseındik sý sharýashylyǵy birlestikteriniń personalyn ınternatsıonaldandyrý jáne basshylaryn rotatsııalaý máselesine bastamashylyq jasady. Jumys tobynyń kezekti otyrystarynda bul máseleni Qazaqstan tarapy kóteretin bolady», - deıdi vıtse-mınıstr Serik Qojanııazov.
Qazaqstan taraby bul máseleni Halyqarylyq Araldy qutqarý qorynyń aıasynda da, atalmysh nysandar ornalasqan Ózbekstan bıligimen kelissózder aıasynda da talqylap, naqty usynystar kóterip júr.
«Shynymen de Syrdarııa basseıindik sharýashylyq birlestigin Ózbekstan ókili 32 jyl basqaryp kele jatyr. Bul másele jóninde osy ýaqytqa deıin Memleketaralyq úılestirýshi sýsharýashylyǵy komıssııa otyrystary aıasynda jáne ózbek tarapymen eki jaqty kezdesýler barysynda birneshe ret kóterildi. Qazirgi ýaqytta eki eldiń mınıstrleri arasynda Qazaqstan Respýblıkasynyń ókilderin «Syrdarııa» BSB basshysynyń orynbasary, sý bólý jáne sý teńgerimderi basqarmasynyń sý paıdalaný bóliminiń bastyǵy, Gúlistan sý toraptary jáne «Dostyq» kanaly basqarmasy bastyǵynyń orynbasary laýazymdaryna taǵaıyndaý boıynsha ýaǵdalastyqtarǵa qol jetkizdi», - delingen jaýapta.
