Qazaqstannyń ókili Azııalyq tennıs federatsııasynyń dırektorlar keńesiniń quramyna endi
ASTANA. 13 maýsym. QazAqparat - 11 maýsymda Tashkentte Azııalyq tennıs federatsııasynyń esep berý-saılaý konferentsııasy ótti. Konferentsııada qaralǵan basty taqaryptar ATF-tyń prezıdentin jáne onyń dırektorlar keńesiniń quramyn qaıta saılaý boldy. Bul týraly QR Tennıs federatsııasynan málim etti.
Talqylaý barysynda jáne onyń sońynan bolǵan saılaýdan keıin Anıl Kýmar Hanna ATF-tyń prezıdenti retinde jańa kezeńge qaıta saılandy. Sondaı-aq ATF dırektorlar keńesiniń jańa músheleri saılandy.
Qazaqstandyq sporttyń tarıhynda alǵash ret ATF-tyń dırektorlar keńesiniń quramyna Qazaqstannyń tennıs federatsııasynyń ókili, QTF-tyń vıtse-prezıdenti Ádil Bórlibaev endi. Aıta keteıik, búgingi kúni azııalyq tennısshilerdiń arasynda ATR-dyń eń úzdikter reıtıngisinde qazaqstandyq Andreı Golýbev tur, al kelesi qazaqstandyq Mıhaıl Kýkýshkın osy kórsetkish boıynsha Azııada eń úzdik úshinshi nátıjege qol jetkizip otyr. Al Qazaqstannyń tennısshisi ıAroslava Shvedova byltyr amerıkalyq Vanı Kıngpen birge qatarynan eki «Úlken shlem»-di (Wimbledon , US Open) jeńip alǵan bolatyn.
Qazaqstanda tennıs oıynynyń órkendeýin nazarǵa alyp, Azııalyq tennıs federatsııasy 2008-2009 jyldary Astanada Azııa/Muhıt aýmaǵynyń Holman Kýbogi týrnırin ótkizýdi senip tapsyrǵan bolatyn. 2009 jyly atalmysh týrnırde Qazaqstannyń quramasy jeńiske jetip, Holman Kýbogynyń álemdik tobyna ótti.
2010 jyly Qazaqstannyń erler quramasy Shveıtsarııanyń aıtarlyqtaı myqty komandasyn utyp (5:0), beldi Devıs Kýbogynyń álemdik tobyna ótti. Aǵymdaǵy jyly naýryz aıynda bizdiń komanda qyzý tartysta Chehııanyń komandasyn (3:2) artqa qaldyryp, «Devıs Kýbogy-2011»-diń shırek fınalyna qatysqan jalǵyz azııalyq komanda boldy.
