Qazaqstannyń oblys ortalyqtarynda jáne Mańǵystaý oblysynda sandyq telehabar taratý júıesi iske qosyldy
Bul týraly QR Kólik jáne kommýnıkatsııa mınıstrliginiń baspasóz qyzmetinen habarlady.
Sandyq efırlik televıdenıege kóshý jónindegi baǵdarlamanyń ekinshi kezeńin aıaqtaýǵa baılanysty Mańǵystaý oblysynyń aýyl turǵyndary beınelenýi men dybysy tamasha qazaqstandyq 15 telearnaǵa, al oblys ortalyqtary men olarǵa taıaý ornalasqan eldi mekender turǵyndary 30 telearnaǵa qoldary jetti. Buǵan deıin bul óńirde birdi-ekili ǵana telearna habar taratatyn.
Búgingi kúni sandyq úlgidegi otandyq telearnalar oblys ortalyqtary, Astana jáne Almaty qalalary, sonymen birge Mańǵystaý oblysy turǵyndaryna deıin qoljetimdi boldy. Sonymen, 1150 eldi mekendegi shamamen 8 mln. adam sandyq efırlik telehabarlardy kóre alatyn boldy.
«Aqparatty Qazaqstan-2020» memlekettik baǵdarlamasynyń aıasynda habar taratýdyń sandyq júıesi ishki jáne shekara mańyndaǵy aýmaqtardy, ıaǵnı jurtshylyqtyń 95%-yn qamtıtyn boldy. Osy arqyly aýyl jáne qala turǵyndarynyń aqparattyq teńsizdigin joıý máselesi sheshiledi.
Ótken jylǵy maýsym aıynda ındýstrıaldyq forým aıasynda sandyq efırlik televıdenıege kóshý baǵdarlamasynyń birinshi kezeńi iske qosylyp, ol Astana, Almaty, Qaraǵandy, Jezqazǵan, Jańaózen jáne olarǵa jaqyn ornalasqan eldi mekenderdi qamtyǵandyǵyn eske salamyz. Sonyń arqasynda respýblıkanyń 370 eldi mekeninde turatyn 3,5 mln qazaqstandyqtar sandyq efırlik televıdenıege qol jetkizgen bolatyn.
