Qazaqstannyń Norvegııadaǵy elshiliginde tuńǵysh ret jas jubaılardyń nekesi qıyldy
NUR-SULTAN.QazAqparat - Qazaqstannyń Norvegııadaǵy elshiliginde erekshe saltanatty shara ótti. Shetelde bilim alyp jatqan qazaqstandyq eki stýdent munda nekelerin qıdy, dep habarlaıdy QazAqparat Embassy of Kazakhstan in Norway saıtyna silteme jasap.
Aıta keteıik, munaı sharalar ádette dıplomatııalyq ókildikterde uıymdastyrylmaıdy. Degenmen osy joly nekelerin Norvegııanyń Ońtústik-Shyǵys ýnıversıtetiniń doktoranty Eljas Jaqsylyq pen Ispanııanyń Gijon ýnıversıtetiniń magıstranty Ásel Elýbaeva qıdy. Jas jubaılar Almatydaǵy Qazaq-Brıtan Tehnıkalyq ýnıversıtetinde bakalavrıat baǵdarlamasy boıynsha bilim alyp júrgen kezde tanysqan. Qýanyshty jańalyqty bólisý úshin Qazaqstannan Norvegııa astanasyna jas jubaılardyń dostary da keldi. Olar neke qııý kezinde kýáger boldy.
Jas otbasyna neke týraly kýálikti Qazaqstannyń Norvegııadaǵy Tótenshe jáne Ókiletti elshisi Erkin Aqynjanov tabystady.
Aıta ketetin jaǵdaı, Osloda Qazaqstan elshisine áli Norvegııa Koroli Harald V senim gramotasyn tapsyrý kerek. E.Aqynjanov jańa otaý qurǵan jastarǵa zor baqyt tilep, ózderi qalaǵandaı bilim alýlaryna jáne jumystarynyń sátti bolýyna tilektestigin bildirdi.
Neke qıylǵany týraly memlekettik tirkeýdi Elshiliktiń konsýldyq bólimi júzege asyrdy.
«Jas jubaılar konsýldyq ókilderine bir aı buryn qajetti qujattaryn alyp kelip, ótinish bildirdi. Bul bizdiń elshiligimizdiń tarıhynda alǵash bolyp otyrǵan jaǵdaı. Árıne, bul dıplomatııalyq ókildik úshin qýanyshty oqıǵa»-dedi elshiliktiń Konsýly Azat Mátenov.
«Nekeni tirkeý elimizdiń azamattaryna bizdiń konsýldyq qyzmet tarapynan kórsetiletin kóptegen qyzmetterdiń biri. Qazaqstannyń búkil álemdegi konsýldyqtarynda týý týraly, qaıtyp kelý týraly kýálikter beriledi jáne qujatty rásimdeý, qazaqstandyq azamattyqty qabyldaý men qalpyna keltirý jumystaryna kómek kórsetiledi. Sondaı-aq talap etilgen qujattardyń jetkizilýine yqpal etý, qujattardy zańdastyrýǵa qolǵabys etip, zańdyq turǵyda túrli anyqtamalar beriledi. Atalǵan jumystarmen qatar ózge de kóptegen sharalar uıymdastyrylady jáne konsýldyq-quqyqtyq kómek kórsetiledi»,-delingen habarlamada.
A.Mátenovtyń sózinshe, osy kezde Qazaqstannyń Norvegııadaǵy elshiliginiń konsýldyq esebinde elimizdiń 119 azamaty tur. Olardyń basym bóligi munaı kompanııalarynda jumys isteıdi. Osyǵan qaraı olardyń kópshiligi munaı óndirý, ony qaıta óńdeý, munaı óńdeý jobalaryn servıstik qoldaý boıynsha biliktiligi joǵary mamandar bolyp tabylady. 
«Olardyń quqyqtary men múddelerin qorǵaý jáne Norvegııaǵa qysqa merzimdi saparmen kelgen Qazaqstan azamattaryna qoldaý kórsetý bizdiń qyzmetimizdiń basym baǵyty»,-deıdi elshilik ókilderi.
