Qazaqstannyń mýzyka dúnıesi «Shákárim» atty jańa sımfonııamen tolyqty

Shyǵarmany Qazaqstan Respýblıkasynyń halyq ártisi Aıman Musaqojaeva jetekshilik etetin Qazaq Ulttyq óner ýnıversıtetiniń Eýrazııalyq sımfonııalyq orkestri oryndady.

Ónertanýshylardyń aıtýynsha, Qazaqstan táýelsizdik alǵaly beri sımfonııa syndy kúrdeli janrda jazylǵan mýzykalyq shyǵarma bolǵan joq. S. Erkimbekovtyń sımfonııalyq jáne kameralyq janrlarda, opera, balet jáne taǵy basqa týyndylary bar.

«Men sımfonııa sııaqty iri janrda shyǵarma jazý jóninde kópten beri oılanyp júrgenmin», deıdi S. Erkimbekov. «Shákárim Abaıdyń jolyn jalǵasy ispettes. Biraq onyń dúnıege óziniń kózqarasy, óziniń oı-tolǵamy bar adam. Sımfonııada men ózim túsingen Shákárimniń osy ishki dúıesin berýge tyrystym. Men onyń fılosofııasyn, ishki jan dúnıesin, kórgen azabyn asha túsýge, bıiktete túsýge talpyndym», deıdi kompozıtor.

Onyń aıtýynsha, sımfonııanyń birinshi bóligi kóńil-kúı turǵysynda pálsapalyq, tereń oıly, dramalyq sarynda bolsa, ekinshi bóligi aqynnyń dúnıetanymy, arab, parsy maqamy baıqalǵanymen, onyń ózindik kózqarasy berilgen.

S. Erkimbekov batys mýzyka mektebiniń túlegi bolǵanymenen, sımfonııanyń keıbir sharyqtaý shekterinde dombyranyń qońyr únin qosqan. «Dombyra munda teginnen tegin qoldanylyp otyrǵan joq. Bul aqynnyń jan únin beretin ishek dybystary ispettes», dep atap kórsetti ol.

«Shákárim» qazaqtyń metsenat uldarynyń biri Medǵat Quljanovtyń jeke tapsyrys berýimen jazylǵan. «Biz Shákárim babanyń murasyn keleshek urpaqtarǵa qaldyrǵymyz keldi. Abyz aqynnyń kózin kórip, jyry men óleńderin osy ýaqytqa deıin jetkizgen adamdar qatary azaıýda. Biz olardyń únderin kúıtabaqqa, eski jazbalardy áreń-áreń jazyp alýǵa úlgerdik. Endi mine dúnıemiz sımfonııa retinde tolyqty. Bul týyndymen álemdik sahnalarǵa maqtanyshpen shyǵa alamyz», deıdi Medǵat Quljanov.

Shákárim Qudaıberdiuly óleńderiniń negizinde jazylǵan sımfonııany jaryqqa shyǵarýǵa 7-8 aı ýaqyt jumsalǵan.