Qazaqstannyń munaı zaýyttary І jartyjyldyqta 7 mln. tonnadan astam munaı óńdedi
ASTANA. 31 shilde. QazAqparat - Indýstrııalandyrý baǵdarlamasynyń aıasynda elimizde Munaı-gaz salasyn damytýdyń 2010-2014 jyldarǵa arnalǵan salalyq baǵdarlamasy iske asyrylýda.
Bul baǵdarlamanyń maqsaty - halyqaralyq tranzıt kóleminiń ósýin jáne ishki naryqtyń munaı jáne gaz ónimderine degen qajettiligin qamtamasyz etý, dep habarlady pm.kz saıty.
QR Munaı jáne gaz mınıstrliginiń aqparaty boıynsha, munaı óndirýshi kompanııalar aǵymdaǵy jyldyń І jartyjyldyǵynda 39,7 mln. tonna munaı óndirdi, onyń ishinde gaz kondensaty da bar. Aldyn ala málimetter boıynsha, munaı eksportynyń kólemi 33,96 mln. tonnany qurady. Al 2012 jylǵa belgilengen jospar 71 mln. tonnany shamalaıdy.
Oǵan qosa, atalǵan kezeńde Munaı jáne gaz mınıstrligi munaı-gaz kenishterin ıgerý jáne barlaý jumystarynyń 100-den astam jobalaý qujattaryn qarap shyqty, sondaı-aq tehnologııalyq kórsetkishterdi, onyń ishinde 30-dan astam kenish boıynsha munaı óndirisiniń kólemin naqtylady.
Aıta ketý kerek, otandyq munaı óńdeý zaýyttarynda 7 186 myń tonna munaı óńdeldi, bul ótken jyldyń sáıkes kezeńindegi kórsetkishten 10,9 paıyzǵa kóp. 1484 myń tonna benzın, 2095 myń tonna dızel otyny, 1773 myń tonna mazýt, 195 myń tonna avıakerosın óndirildi.
«Indýstrııalandyrý baǵdarlamasyna sáıkes, 2014 jyly qazaqstandyq zaýyttardaǵy munaı óńdeý kólemi 15 tonnaǵa deıin artyp, 84-80 paıyzǵa deıin tereń óńdeletin bolady jáne otandyq munaı ónimderiniń sapasy Eýro sapa standartyna jetkiziledi»,- delingen vedomstvo habarlamasynda.
Búgingi tańda respýblıkada úshi munaı óńdeý zaýyty: Atyraý munaı óńdeý zaýyty, Pavlodar munaı-hımııa zaýyty jáne Shymkent munaı óńdeý zaýyty jumys isteıdi.
Elbasy N.Nazarbaevtyń «Áleýmettik-ekonomıkalyq jańartý - Qazaqstan damýynyń basty baǵyty» atty Qazaqstan halqyna Joldaýymen júktelgen mindetterge sáıkes, elimizde munaıdy tereń óńdeýge, qaldyq aýyr munaı ónimderin joǵary sapaly motor otyndaryna qaıta óńdeýge baǵyttalǵan úsh joba qolǵa alynyp otyr.
Birinshi joba boıynsha Atyraý munaı óńdeý zaýytynda munaıdy tereń óńdeý keshenin iske qosý qarastyrylsa, ekinshi joba - Atyraý gaz-hımııa keshenin jobalyq qýatyna shyǵarýdy, al úshinshi joba - Qarashyǵanaq kenishinde gaz óńdeý zaýytyn salýdy qarastyrady.
Munaı jáne gaz mınıstrliginiń aqparaty boıynsha, qazirgi tańda Atyraý munaı óńdeý zaýytynda munaı óńdeý kesheniniń qurylys alańy daıyndalyp jatyr, 2013 jyldyń naýryz aıynda negizgi qurastyrý jumystary bastalyp, 2015 jyly keshen paıdalanýǵa berilmek.
Al Atyraý gaz-hımııa keshenine keler bolsaq, onda qurylystyń І kezeńi boıynsha negizgi tehnologııalyq qondyrǵylar men ishki jelilerdiń 78 paıyzy jobalanyp bitti, ınfraqurylym nysandaryn jobalaý jumystary aıaqtalýǵa jaqyn. Al Qarashyǵanaq kenishindegi gaz óńdeý zaýyty qurylysynyń birinshi kezeńi 2014-2017 jyldarǵa josparlanyp otyr.
Atalǵan jobalardy iske asyrý munaıdyń óńdelý tereńdigin arttyrýǵa, qaldyq aýyr munaı ónimderin joǵary sapaly motor ónimderine qaıta óńdeýge, sondaı-aq eksporttyq munaı-hımııa ónimderin shyǵarýǵa múmkindik beredi.
