Qazaqstannyń munaı óńdeý zaýyttary AI-95-ti shyǵara bastady

ASTANA. QazAqparat - Qazaqstannyń keıbir munaı óńdeý zaýyttary AI-95 benzınin óndire bastady. Bul týraly búgin Astanada ótken baspasóz máslıhatynda «QazMunaıGaz» UK» AQ-nyń munaı marketıngi, tasymaldaý jáne óńdeý boıynsha vıtse-prezıdenti mindetin atqarýshy Danııar Tıesov habarlady.

«92-shi benzınniń óńirlerdegi qory shamamen 200 myń tonnany quraıdy, bul ázirge benzın jaǵdaıy qalypty dep aıtý úshin jetkilikti. Qazaqstandaǵy 92-shi benzındi tutynýdyń táýliktik normasy - 10 myń tonna. Elimizdegi úsh munaı óńdeý zaýytynan kúnine 8,5 myń tonna benzın alynady jáne táýligine 3-4 myń tonna benzın ımportpen jetkiziledi», - dedi D.Tıesov.

«QazMunaıGaz» ókili AI-95 markasyna qatysty jaǵdaı ózgeshe ekenin atap ótti.

«95-shi benzın boıynsha jaǵdaı sál qıyndaý, keı óńirlerde shekteý qoıyldy jáne OQO, ShQO, Almaty jáne Qyzylorda oblystarynda kartalar men talondar boıynsha satylyp jatyr. Qalǵan óńirlerde shekteý joq. Qazaqstan boıynsha AI-95 benzıniniń 14,5 myń tonna qory bar, bir aıǵa shamamen 20 myń tonna qajet», - dep atap ótti ol.

Sol sebepti, kompanııa ókilderiniń aıtýynsha, qazaqstandyq munaı óńdeý zaýyttarynyń bir bóligi AI-95 markasyn shyǵarýǵa kóshken.

«Dızeldi otyn boıynsha bıyl shamamen 168 myń tonna qorymyz bar. Tutas respýblıka boıynsha janar-jaǵarmaı materıaldary jaǵdaıy turaqty», - dep tolyqtyrdy óz sózin Danııar Tıesov.