Qazaqstannyń munaı óńdeý zaýyttary 3 jylda bir ret qana jóndeý jumystaryna toqtatylady

ASTANA. QazAqparat - Aǵymdaǵy jyldyń shildesinen bastap motor otyndarynyń sapasy K-4 jáne K-5 ekologııalyq klasstaryna sáıkes kelýi tıis. Bul týraly búgin elordada halyqqa esep berý kezdesýi barysynda QR Energetıka mınıstri Qanat Bozymbaev aıtty, dep habarlaıdy QazAqparat tilshisi.

«Aǵymdaǵy jyly Shymkent zaýytyndaǵy jańǵyrtý jumystary aıaqtalady. 2018 jyly munaı óńdeýdiń jalpy kólemi 1 mln tonnaǵa ósip, 16 mıllıon tonnandan asyp jyǵylady. Kólik júrgizýshileri úshin munaı ónimderiniń sapasy mańyzdy. Osy jyldyń basynan bastap, Keden odaǵynyń Tehnıkalyq reglamenti kúshine endi. Aǵymdaǵy jyldyń shildesinen bastap motor otyndarynyń sapasy K-4 jáne K-5 ekologııalyq klastaryna sáıkes kelýi tıis», - dedi Qanat Bozymbaev.

Onyń aıtýynsha, aǵymdaǵy jyly úsh munaı óńdeý zaýytyna engiziletin jóndeýdi basqarýdy avtomattandyrý júıesi munaı óńdeý zaýyttaryn jóndeýdiń jyldyq kezeńin 45-ten 20 kúnge deıin qysqartýǵa múmkindik berdi. 45 kúnge toqtatý jumystary úsh jylda bir ret júzege asyrylatyn bolady.

«Ár munaı óńdeý zaýytyndaǵy munaı óńdeý kólemi osy qabyldanǵan sharalardyń arqasynda orta eseppen jylyna 300 myń tonnaǵa artady dep kútilýde. Osylaısha, taıaý aralyqta bizdiń naryq otandyq munaı ónimderimen tolyqtaı qamtamasyz etiledi. Atap aıtqanda, 5 aıda naryqtyń otandyq munaı ónimderimen qamtamasyz etilýi benzın boıynsha - 85, dızeldik otynmen - 95, áýe kerosınmen shamamen 36 paıyzǵa jetti», - dedi ol.

Qanat Bozymbaevtyń atap ótýinshe, tapshylyqty boldyrmaý maqsatynda Energetıka mınıstrligimen táýlik boıy munaı bazalaryndaǵy ónimder kólemi jáne janar-jaǵarmaı ımporty baqylaýda bolady.