Qazaqstannyń munaı-gaz kompanııasy Astananyń birqatar aýrýhanalaryna medıtsınalyq jabdyqtar syılady (FOTO)
ASTANA. QazAqparat - Búgin Astanadaǵy № 2 qalalyq balalar aýrýhanasy ǵımaratynda elordanyń 10 balalarǵa arnalǵan medıtsınalyq, bilim berý jáne áleýmettik mekemeleriniń basshylaryna zamanaýı ári ınnovatsııalyq medıtsına qural-jabdyqtaryn alýǵa arnalǵan sertıfıkattar tabys etildi.
Shara jyl saıyn «Shevron» kompanııasy «Aıala» qaıyrymdylyq qorymen birlesip ótkizetin qaıyrymdylyq aktsııasy aıasynda ótti.
«Bul aýrýhanaǵa biz sensorlyq bólme ashyp berdik. Bolashaqta bul bólme balalardyń densaýlyǵyn saqtaýda kóp kómektesedi dep senemiz», - dep atap ótti kompanııa ókili Janar Qoshpanova shara barysynda.
Onyń aıtýynsha, «Shevron» kompanııasy Qazaqstanda da, basqa elderde de medıtsınalyq uıymdardy árdaıym qoldap otyrýdy óziniń áleýmettik ınvestıtsııalyq saıasaty retinde ustanady.
«Densaýlyq saqtaý mekemelerine zamanaýı medıtsınalyq qural-jabdyqtar syılaýmen qatar, biz mamandardy medıtsınanyń eń sońǵy jańalyqtaryna úıretip, sheteldik áriptesterimen tájirıbe almasý joldaryn da uıymdastyryp otyramyz», - deıdi kompanııa ókili.
Óz kezeginde «Aıala» qorynyń vıtse-prezıdenti Jangeldi Sársenov «Shevron» kompanııasynyń jumysy elimizdegi barlyq bıznes ókilderin balalardy áleýmettik turǵyda qoldaýǵa úlgi bolatynyn atap ótti.
Aıta keteıik, aktsııa aıasynda Astananyń № 3 perınataldyq ortalyǵyna jansaqtaý ústeli, 4 shprıtstik dozator, fototerapııa apparaty jáne basqa da qurylǵylar syılandy.
Qalalyq № 1 balalar aýrýhanasyna 5 ottegilik kontsentrat, 4 ınfýzııalyq stantsııa, 2 ınfýzııalyq dozator, sondaı-aq, oıyn bolmesine arnalǵan zattar men jıhazdar ornalastyryldy.
Qalaqy № 2 balalar aýrýhanasy tirek-qozǵalys apparaty buzylǵan balalardy emdeıtin «Relaks» sensorlyq bólmesine ıe boldy.
