Qazaqstannyń múgedek áıelder uıymdary jelisi Ulttyq is-áreket josparyna usynys jasaıdy
ALMATY. 9 jeltoqsan. QazAqparat /Erbol Turymbetov/ - Qazaqstannyń múgedek áıelder uıymdary men kóshbasshylary jelisi Múmkinshiligi shekteýli adamdardyń quqyqtaryn qamtamasyz etý jáne ómir sapasyn jaqsartý jónindegi ulttyq is-áreket josparyna usynys ázirledi.
Bul týraly búgin «Shyraq» Múgedektigi bar áıelder qaýymdastyǵy» Qoǵamdyq birlestiginiń tóraıymy, QR Úkimeti janyndaǵy múgedekterdi áleýmettik qorǵaý salasyndaǵy Úılestirý keńesiniń múshesi Lázzat Qaltaeva Almatyda ótken baspasóz máslıhatynda málimdedi.
Qazaqstannyń múgedektigi bar áıelderi ózderiniń kókeıkesti máselelerine qatysty naqty sharalardy qabyldaý qajettigi týraly málimdeý úshin alǵash ret Jelige birigip otyr. Ulttyq is-áreket josparyna ázirlengen usynystarda jynysy men múgedektigi jaǵynan kemsitýshilik jáne múgedektigi bar qyzdar men áıelderdiń turmys-tirshiligine mán berilgen.
«Kemsitýshilik kózqaras saldarynan múgedek áıelderdiń qoǵamǵa kirige almaýy olardy qalypty adamdyq qarym-qatynastan qur qaldyrýda. Olar eńbek naryǵyna qatysa almaıdy, ózderiniń reprodýktıvtik quqyqtaryn júzege asyrýǵa múmkindikteri joq. Osy jáne basqa da qaterler saldarynan olar ózderine qol jumsaýǵa deıin barady», deıdi L. Qaltaeva. Onyń aıtýynsha, atalmysh usynysta osy máselelerdiń sheshý joldary qarastyrylǵan.
QR Eńbek jáne halyqty áleýmettik qorǵaý mınıstrliginiń bıylǵy derekteri boıynsha, Qazaqstanda múmkindigi shekteýli jandar jalpy halyq sanynyń 3 paıyzyn nemese 485,4 myń adamdy quraıdy. Olardyń ishinde, 231 myńǵa jýyǵy qyzdar men áıelder. Bul Qazaqstandaǵy múmkindigi shekteýli adamdardyń jalpy sanynyń 48 paıyzyn quraıdy.
