Qazaqstannyń MMA sportshylary Álem chempıonatynda 12 medal aldy
QARAǴANDY. QazAqparat – Qazaqstannyń MMA sportshylary jasóspirimder arasyndaǵy Álem chempıonatynda bir altyn, úsh kúmis jáne segiz qola medal jeńip aldy, dep habarlaıdy QazAqparat tilshisi.
Jarys Bolgarııa astanasynda 14-15 jáne 16-17 jas aralyǵyndaǵy sportshylar arasynda ótti. Oǵan 23 elden 300-den astam sportshy qatysty. Qazaqstan namysyn 29 sportshy qorǵady.
«Álem chempıonatynyń qorytyndysy boıynsha qazaqstandyq komandanyń esebinde bir altyn, úsh kúmis jáne segiz qola júlde bar. Bul rette toǵyz medaldi qyz balalar jeńip aldy. Jalǵyz «altyndy» Batys Qazaqstan oblysynan Raııana Aqdáýletova aldy», - dep málim etti Qaraǵandy oblysynyń Dene shynyqtyrý jáne sport basqarmasynan.
Qaraǵandylyq sportshylar arasynda Igor Ahmatov pen Nıkıta Lıamın Álem chempıonatynyń «qolasyna» ıe boldy.
«Qaraǵandy oblysy MMA federatsııasynyń jas ókilderi eń joǵary halyqaralyq deńgeıde laıyqty óner kórsetkenine qýanyshtymyz. Nıkıta Lıamın aralas jekpe-jekpen eki jyldan az ýaqyt aınalysyp keledi. Degenmen, qazirdiń ózinde osyndaı nátıje kórsetti. Jasóspirimder arasyndaǵy Álem chempıonatynyń qola júldegeri – ázirge onyń eń joǵary marapaty.
Igor Ahmatov tájirıbeli kúresker. Ol qazirdiń ózinde bedeldi halyqaralyq birinshilikterde, biraq kúshtik jekpe-jektiń basqa túrleri boıynsha marapattarǵa ıe bolǵan. MMA boıynsha Álem chempıonatynda Igor tórt jekpe-jek ótkizdi. Sońǵysynda tóreshiler sheshimimen qarsylasyna ese jiberip aldy», – dedi Qaraǵandy oblysy MMA federatsııasynyń basshysy Vladımır Abrosımov.
Jattyqtyrýshy balalardyń jeńiske degen umtylysyn atap ótti jáne olardyń tálimgerlerine jaqsy daıyndyqtary úshin alǵys aıtty.
