Qazaqstannyń MMA sheberleri Álem chempıonatynda baq synaıdy
ASTANA. QazAqparat - 11 qarashada MMA sport túri boıynsha Qazaqstan ulttyq quramasy Bahreın astanasy Manamada ótetin álem chempıonatyna attanady. 12-19 qarasha aralyǵynda ótetin chempıonat qatysýshy elderdiń sany boıynsha rekordtyq kórsetkishke ıe. Oǵan 14 salmaq dárejesinde álem chempıony ataǵy úshin 51 elden 252 sportshy baq synaıdy, dep habarlaıdy «QazAqparat» HAA tilshisi.
Qazaqstan namysyn álem chempıonatynda ulttyq quramasynynyń 15 sportshylary qorǵaıdy. Onda Qazaqstannyń atynan alǵash ret áıelder dıvızıonda 52,2 kg deıin salmaqta Azııa vıtse-chempıony almatylyq Aıan Tursyn jáne 56,7 kg deıin salmaqta Taldyqorǵan sportshysy Gúlmıra Nuǵmanova qatysady.
Erler arasynda 56,7 kelige deıingi salmaqta Ernaz Musabek (Astana) jáne Dastan Jaqypbek (Almaty oblysy), 61,2 kelige deıingi salmaqta Dinıslam Jetpisov (Qaraǵandy), Oljas Moldaǵalıev (Atyraý), 65,8 kelige deıingi salmaqta Qazaqstan chempıony Mereı Jubanov (Qaraǵandy) jáne Azııa chempıonatynyń kúmis júldegeri Bekzat Jasııa (OQO) qorǵaıdy. Al 70,3 kelidegi salmaqta Azııa chempıonatynyń kúmis júldegeri Neımat Asadov (Qaraǵandy) jáne Darhan Jumabaı (Aqmola oblysy),77,1 kelige deıin Azııa chempıony Jan Kenjebaev (Almaty) jáne Qazaqstan chempıonatynyń qola júldegeri Mahır Alıev (Astana) sharshy alańǵa shyǵady.
83,9 kelilik MMA sheberleri arasynda Qazaqstannyń atynan Azııa chempıonatynyń qola júldegeri Meırambek Demeýbaev (Astana) jáne Qazaqstan chempıonatynyń qola júldegeri Mádı Dosmuhametov (Almaty oblysy) barsa, 93 kelige deıin Azııa jáne Eýropa chempıonattarynyń qola júldegeri Qudaıbergen Tóleýbaev (Qaraǵandy) shyǵady.
«Bul MMA boıynsha Álem chempıonaty - eń iri saıys bolmaq. Buryn mundaı báseke bolǵan emes. Bıylǵy jyly memlekettik qoldaýdyń arqasynda biz álem chempıonatynda árbir salmaq kategorııasynda eki sportshydan aparatyn boldyq. Qazirgi ýaqytta, bapkerler ujymy men bas bapker Baıan Janǵalovtyń basshylyǵymen sportshylar daıyndyǵynyń qorytyndy kezeńi aıaqtalyp jatyr. Osyndaı oqý-jattyǵý ádisin qoldaný bizdiń sportshylarymyzdyń álem chempıonatynda elimizdi joǵary dárejede usynýǵa múmkindik beredi. Buıyrsa, dástúr boıynsha Qazaqstan quramasy tamasha nátıje kórsetedi», - deıdi Qazaqstan MMA federatsııasynyń birinshi vıtse-prezıdenti Asylbek Dúısenov.
Álem chempıonaty IMMAF halyqaralyq MMA federatsııasy uıymdastyrýmen aralas jekpe-jek aptalyǵy aıasynda ótip, sońynda «Brave» halyqaralyq kásibı týrnır ótedi.
