Qazaqstannyń MMA quramasy alǵash ret Eýropa chempıonatyna attandy
ASTANA. QazAqparat - Qazaqstannyń MMA quramasy IMMAF nusqasy boıynsha alǵash ret Eýropa chempıonatyna attandy. Chempıonat Bolgarııa astanasy Sofııa qalasynda 29 naýryz ben 2 sáýir aralyǵynda ótedi, dep habarlaıdy QazAqparat.
Qazaqstannyń MMA qaýymdastyǵy baspasóz qyzmetiniń aqparatyna sáıkes baıraqty básekede elimizdiń namysyn myna sportshylar qorǵaıdy: 56,7 kelide MMA boıynsha Eýropa chempıonatynyń qola júldegeri Berik Shynalıev (Almaty), 77,1 kelide MMA boıynsha Astana jáne Aqmola oblysynyń chempıony Djohar Taımýshanov (Aqmola oblysy), 93 kelide MMA boıynsha Qazaqstan Respýblıkasy Kýbogynyń chempıony jáne Dostastyq kýbogynyń qola júldegeri Qudaıbergen Tóleýbaev (Karaǵandy oblysy).
Eske sala ketsek, 2017 jyldyń 3 naýryzynda halyqaralyq IMMAF uıymy músheliginiń murageri atanǵan Qazaqstannyń MMA qaýymdastyǵy quryldy. Qaýymdastyq tóraǵasy Asylbek Dúısenovtiń aıtýynsha, atalǵan Eýropa chempıonaty Qazaqstan quramasy úshin osy uıymdaǵy alǵashqy doda. Eýropa chempıonaty Qazaqstan úshin mindetti emes. Degenmen elimizdiń sportshylary osy dodaǵa qatysyp, óz kúshterin synamaq.
«Buryn chempıonattarǵa áýesqoılarmen qatar kásipqoı tájirıbesi bar sportshylar qatysyp kelgendikten aldaǵy ýaqytta Qazaqstannyń ulttyq quramasy tolyǵymen jańarýy múmkin. Bul shara jastar úshin álemniń eń úzdik halyqaralyq arenalarda kórinýine múmkindik týǵyzady. Al kásipqoı týrnırlerge qatysyp ysylǵan sportshylar ári qaraı da mansabyn jalǵastyryp, tek Qazaqstandaǵy ǵana emes sonymen qatar halyqaralyq dodalarǵa qatysady», - dedi Asylbek Dúısenov.
Óz kezeginde Qazaqstannyń MMA federatsııasynyń prezıdenti jáne Qazaqstannyń MMA qaýymdastyǵy tóraǵasynyń orynbasary Anatolıı Kım keleshek josparlarymen bólisti.
«Qaraǵandy qalasynda sáýirdiń aıaǵynda ótetin MMA boıynsha Qazaqstan chempıonaty men oqý-jattyǵý jıyny qorytyndysy boıynsha elimizdiń ulttyq quramasyna qatań irikteý bolady. Keleshekte ótetin Azııa men álem chempıonatynda Qazaqstan quramasy tolyq quramymen qatysady», - dedi ol.
