Qazaqstannyń mıllıoneri: Mektep oqýshysy qandaı jobany iske asyrdy
ASTANA. QazAqparat - Búgin Astana Innovation Challendge jobasy aıasynda aqparattyq texnologııalardy damytý máselesi keńinen talqylanyp, qarapaıym ári tabysty bastamalar sóz boldy. Osy oraıda qatysýshylar mıllıoner atanǵan mektep oqýshysyn da eske aldy, dep xabarlaıdy QazAqparat tilshisi.
«Jaqynda Nazarbaev zııatkerlik mektebiniń oqýshysy Ivan Krepak «Nur Intex» baıqaýynyń jeńimpazy atandy. Onyń shaǵyn ǵana jobasy úsh aıdyń ishinde 7 000 000 teńgeniń ICO-syn jınady. Mektep oqýshysy úshin bul - úlken jetistik. Al onyń oılap tapqan startapy nesimen erekshelenedi? Arnaıy mobıldi qosymshada xalyqaralyq jáne respýblıkalyq olımpıadalar týraly aqparat jınaqtalady. Búginde atalǵan qosymsha stýdentter men oqýshylar arasynda joǵary suranysqa ıe. Menińshe, osyndaı jobalardy kez kelgen salada iske asyrýǵa bolady», - deıdi «Nur Otan» partııasynyń xatshysy Farxad Qýanǵanov.
Onyń aıtýynsha, búginde munaıdyń arqasynda memleketti damytý zamany artta qaldy. Qazaqstan ekonomıkasynyń kapıtalızatsııasy AQSh-tyń aqparattyq texnologııalar salasyndaǵy alǵashqy úsh kompanııasynyń aqsha aınalymyna da jetpeıdi. Osynyń ózi tsıfrlyq texnologııalardyń basymdyǵyn kórsetse kerek.
«2013 jyly Reseıde tsıfrlyq texnologııalardyń dúmpýi baıqaldy. Sebebi salyq jaǵynan jaqsy jeńildikter jasaldy. Menińshe, biz de osy ispetti sharalardy qolǵa alýymyz qajet», - dep atap kórsetti F.Qýanǵanov.
Aıta keteıik, Astana Innovation Challendge jobasy aıasyndaǵy kezdesýge QR Premer-Mınıstriniń orynbasary Asqar Jumaǵalıev te qatysyp, jas ınnovatorlarǵa óz keńesin berdi.
Al Astana qalasynyń ákimi Áset Isekeshev «aqyldy PIK» júıesin engizýdi kózdeıdi.
Bolashaqta jyljymaıtyn múlik boıynsha biryńǵaı ıntellektýaldy júıeni engizý josparlanǵan.
