Qazaqstannyń memlekettik satyp alý júıesi álemdegi úzdikterdiń biri sanalady
«Búgingi tańda memlekettik satyp alýdyń barlyq protsesi avtomattandyrylǵan. Dúnıejúzilik Banktiń zertteýlerine sáıkes, Qazaqstannyń elektrondyq memlekettik satyp alý júıesi álemdegi eń úzdikterdiń biri bolyp tabylady. Memlekettik satyp alý derekteriniń qoljetimdigi álemdik reıtıngide Qazaqstan 109 eldiń ishinde 3-orynǵa ıe boldy», - dedi D. Keńbeıil Ortalyq kommýnıkatsııalar qyzmetinde ótken baspasóz máslıhatynda.
Spıkerdiń aıtýynsha, búginde memlekettik satyp alý veb-portalynda 100 myńnan astam ónim berýshi jáne 24 myńnan astam tapsyrys berýshi tirkelgen.
2022 jyldyń qorytyndysy boıynsha memlekettik satyp alý kólemi 5,9 trln astam teńgege jetken. Memlekettik satyp alýlardaǵy shartty únemdeý – 632 mlrd teńgeni qurady.
Ótken jyly «Kvazımemlekettik sektordyń jekelegen sýbektileriniń satyp alýy týraly» jańa Zań qoldanysqa engizildi jáne «Memlekettik satyp alý týraly» qoldanystaǵy Zań jańartyldy.
«Osylaısha básekelestikti damytýǵa, sybaılas jemqorlyq táýekelderin azaıtýǵa jáne satyp alý protsesterin jeńildetýge baǵyttalǵan birqatar zańnamalyq sharalar qabyldandy. 2022 jylǵy 1 shildeden bastap qurylys-montajdaý jumystary jáne jobalaý boıynsha satyp alýlar reıtıngtik – baldyq júıeni paıdalana otyryp, jańa ádis-konkýrsty qoldana otyryp júzege asyrylady. Bul ádis konkýrstyq komıssııa músheleriniń qatysýyn boldyrmaıdy jáne satyp alý jeńimpazyn avtomatty túrde anyqtaıdy», - dedi D. Keńbeıil.
Sonymen birge, satyp alýdy onlaın rejımde júrgizýge múmkindik beretin elektrondy dúken engizildi. Rásimderdi ońaılatý maqsatynda negizdemelik kelisimderdi paıdalana otyryp, konkýrs túrinde satyp alýdyń jańa tásili engizildi. Bul ádis satyp alý protsedýralaryn 2 aıdan 30 kúnge deıin qysqartqan.
