Qazaqstannyń memlekettik qyzmeti jańa kezeńdegi reformalardy bastaǵaly tur - Á.Báımenov
ASTANA. 26 sáýir. QazAqparat - «Qazaqstannyń memlekettik qyzmeti jańa kezeńdegi reformalardy bastaǵaly tur»,- deıdi Memlekettik qyzmet isteri agenttiginiń tóraǵasy Álıhan Báımenov.
Bul týraly ol búgin «Memlekettik qyzmetshilerdi oqytý tujyrymdamasy týraly» taqyrypta ótken Memlekettik qyzmetti jetildirý jónindegi saraptamalyq keńestiń VI májilisinde aıtty.
Onyń sózinshe, byltyrǵy jyly bekitilgen Memlekettik qyzmetshilerdi oqytýdyń jańa tujyrymdamasynda memlekettik qyzmetshilerdiń oqytýdyń búkil júıesi ózgeriske ushyraıtyndyǵy kórsetilgen. Sonymen qatar biryńǵaı ádistemelik jáne úılestirý keńesi retinde Memlekettik basqarý akademııasynyń róli arta túsedi.
«Biz jýyrda ǵana Kanada men AQSh elderinde bolyp qaıttyq.
Onda osy memleketterdiń memlekettik qyzmetkerlerdi oqytýdyń tájirıbesimen tanystyq. Sondaǵy baıqaǵanymyz atalmysh elderde memlekettik qyzmetshilerdi oqytý men olardyń biliktilikterin kóterýge úlken mańyz berilip otyr»,-dedi agentik tóraǵasy.
Onyń sózinshe, Memleket basshysy da árdaıym memlekettik qyzmetkerlerdiń bilimi men biliktiligin jetildirý júıesiniń sapasyn kóterýge udaı nazar aýdaryp keledi. «Memlekettik qyzmettiń deńgeıin, sapasyn kóteremiz desek, bizge de Elbasy aldyǵa qoıyp otyrǵan mindetterdiń úddesinen shyǵa bilý kerek»,-dedi Á.Báımenov.
Májilis barysynda QR Prezıdenti janyndaǵy Memlekettik basqarý akademııasynyń Biliktilikti jetildirý ınstıtýtynyń dırektory Bolat Úrkimbaev Memlekettik qyzmetshilerdi oqytýdyń jańa tujyrymdamasyna qatysty baıandama jasap, májiliske qatysýshylar ony talqyǵa saldy.
