Qazaqstannyń memlekettik boryshy kóp emes - Tımýr Súleımenov

ASTANA. QazAqparat –Prezıdent Ákimshiligi basshysynyń birinshi orynbasary Tımýr Súleımenov Astanada ótip jatqan Strategııalyq bastamalar forýmynyń kýlýarynda Qazaqstannyń memlekettik boryshy týraly aıtty, dep habarlaıdy QazAqparat tilshisi.

«Ekonomıkany monopolııasyzdandyrý jumysy júrip jatyr, komıssııa esebin berip turady. Sizdiń suraǵyńyzdy jaqsy túsinip turmyn. Ózim de osy eldiń azamatymyn, osynda týyp- óstim. Árdaıym osy elde tura beremin. Meniń de kútip júrgen belgili bir dúnıelerim bar. Men de keıbir nárselerdiń jyldamyraq istelgenin qalaımyn. Búgin aıtqan dúnıe erteń istelip tursa...Biraq, memlekettik basqarý, ekonomıka, ásirese naryqtyq ekonomıka kúrdeli protsesterden turatynyn túsinetin shyǵarsyzdar. Sondyqtan jumys istelip jatyr. Biraq keıbir dúnıelerdi áldeqaıda tııanaqty, uqypty isteý qajet», - dedi ol BAQ ókilderiniń suraǵyna bergen jaýabynda.

Prezıdent Ákimshiligi ókiliniń aıtýynsha, Qazaqstannyń memlekettik boryshy halyqaralyq standarttan áldeqaıda tómen.

«Ózderińiz biletindeı, bizdiń memlekettik borysh kóp emes. Jalpy ishki ónimniń 27 paıyzyna teń. Al álemdik jalpy standart – 50-60 paıyz», - dedi Tımýr Súleımenov.