Qazaqstannyń memlekettik boryshy qaýipsiz deńgeıde - Qarjy mınıstri
ASTANA. QazAqparat - Qazaqstannyń memlekettik boryshy qaýipsiz deńgeıde. Bul týraly búgin QR Parlamenti Májilisiniń jalpy otyrysynda «Qazaqstan Respýblıkasy Úkimetiniń jáne Respýblıkalyq bıýdjettiń atqarylýyn baqylaý jónindegi esep komıtetiniń 2014 jylǵy respýblıkalyq bıýdjettiń atqarylýy týraly esepteri jóninde baıandama jasaǵan QR Qarjy mınıstri Baqyt Sultanov aıtty.
«Memlekettik borysh aǵymdaǵy jyldyń basynda 5 trln. 655 mlrd. teńgeni nemese jalpy ishki ónimge 14,9 paıyzdy qurady. Memleket kepildik bergen borysh 83 mlrd. teńgeni, ıaǵnı, jarty mlrd. AQSh dollary nemese jalpy ishki ónimniń 0,2 paıyzyna teń. Memlekettik borysh quramyna Úkimettiń, Ulttyq banktiń jáne jergilikti atqarýshy organdardyń boryshy kiredi», - dedi B.Sultanov.
Onyń atap ótýinshe, syrtqy borysh Úkimette ǵana bar. Ol bir trln. 435 mlrd. teńgeni nemese jalpy ishki ónimge 3.8 paıyzdy quraıdy.
«Memlekettik borysh qaýipsiz deńgeıde qalyp otyr. Bul shekti shamadan tómen. Ulttyq banktiń derekteri boıynsha eldiń syrtqy boryshy 157 mlrd. AQSh dollaryn nemese jalpy ishki ónimniń 74 paıyzyn qurady. Al tikeleı ınvestıtsııalardy, ıaǵnı, fırmaaralyq bereshekterdi alyp tastasaq 78 mlrd. AQSh dollaryn nemese jalpy ishki ónimge 37 paıyzdy quraıdy», - dedi ol.
Mınıstrdiń aıtýynsha, memlekettik sektordyń syrtqy boryshy 7,3 mlrd. AQSh dollaryn qurap otyr.
