Qazaqstannyń mektepteri jańarǵan mazmundaǵy bilimge 2020 jylǵa qaraı aýysyp bitedi
ASTANA. QazAqparat - 2020 jylǵa qaraı Qazaqstandaǵy orta mektepterdiń barlyǵy jańarǵan mazmundaǵy bilim berý júıesine aýysyp bitedi. Bul týraly búgin Astana pedagogtarynyń tamyz konferentsııasy barysynda Bilim jáne ǵylym mınıstri Aslan Sárinjipov málim etti.
«Qurmetti ustazdar, áriptester, biz úshin ár jańa oqý jylynyń bastalýy - úlken mereke. Aldymyzdaǵy oqý jylynda jańarǵan mazmunyndaǵy bilim berý júıesine kóshýdi bastaımyz. Elbasynyń «100 naqty qadam» baǵdarlamasynda bergen tapsyrmasyna oraı, mektep júıesin kezeń-kezeńimen jańarǵan mazmunǵa kóshirý máselesi pysyqtaldy», deı kele mınıstr elimizdegi mektepter kezeńimen jańa standartqa aýysa bastaıtynyn aıtty. «Bıyl jańa standartty ilki joba retinde 30 mektepte aprobatsııadan ótkizemiz. Kelesi jyly respýblıkadaǵy mektepterdiń birinshi synyp oqýshylary túgeldeı jańarǵan mazmunǵa aýysyp bitedi. Al, jalpy orta mektepterdiń barlyǵy 2020 jylǵa qaraı jańarǵan mazmundaǵy bilim berý júıesine aýysady»,-dedi mınıstr.
