Qazaqstannyń mektep oqýlyqtary negizinen Qytaı men Túrkııada basyp shyǵarylady - A.Sárinjipov

ASTANA. QazAqparat - Qazaqstannyń mektep oqýlyqtary negizinen Qytaı men Túrkııada basyp shyǵarylady. Óıtkeni atalǵan elderde oqýlyq basyp shyǵarý anaǵurlym arzan. Bul týraly búgin Májiliste oqýlyqtardyń sapasy jáne bilim berý uıymdaryn oqýlyqtarmen qamtamasyz etýge arnalǵan Úkimet saǵatynda Bilim jáne ǵylym mınıstri Aslan Sárinjipov málimdedi.

«Jalpy, elimizdegi oqýlyqtardy ázirleý Qazaqstanda júzege asyrylady, al basyp shyǵarý shetelderde júzege asyrylyp jatyr. Bul negizi bıznestiń (naryqtyń) máselesi. Óıtkeni, qaı jerde baǵa arzan bolsa, bıznes sol jerge baryp kitap basyp shyǵarady», - dedi A.Sárinjipov. Onyń sózine qaraǵanda, oqýlyqty basyp shyǵarýǵa onyń jalpy qunynyń 5-10 paıyzy ketedi. Al negizgi soma avtorlyq jumystarǵa, dızaınǵa jáne ádistemelikke jumsalady. Budan bólek, vedomstvo basshysy oqýlyqty ázirleýmen negizinen baspalar aınalysatynyn, al mınıstrlik olarda baǵa qalaı qalyptasatynynan habardar emes ekenin alǵa tartady. Óıtkeni, mınıstrdiń aıtýynsha, bul jeke bıznes bolyp sanalady. «Aıta keteıik, biz ózimizdiń balama oqýlyǵymyzdy - «Qazaq tili» oqýlyǵyn shyǵardyq. Oǵan avtorlyq ujymdy ózimiz tarttyq, osyndaı biregeı oqýlyqty endi synaqtan ótkizýdi de josparlaımyz. Jalpy, osy oqýlyqty shyǵarý úshin mınıstrlik 70 mıllıon teńge shyǵyndady», - dedi A.Sárinjipov.