Qazaqstannyń medıtsınany tsıfrlandyrý tájirıbesine AQSh qyzyǵýshylyq tanytty
Densaýlyq saqtaý mınıstrliginiń málimetinshe, medıtsınalyq aqparattyq júıelerdiń ózara árekettesýi kezinde almasatyn aqparattyń mánin birdeı túsiný úshin Densaýlyq saqtaý vıtse-mınıstri Oljas Ábishev 23 sáýir kúni «Tsıfrlyq densaýlyq saqtaý keńistiginde obektilik sáıkestendirgishti berý týraly» erejesin bekitken.
Ereje bir platformada biryńǵaı ortalyqtandyrylǵan medıtsınalyq derekterdiń qoımasyn qurýǵa múmkindik beredi. Bul - úlken derekterdi qosymsha óńdeýsiz almasý.
Bul oqıǵa AQSh Qorǵanys mınıstrliginiń qaýip-qaterdi azaıtý jónindegi agenttigin qyzyqtyrdy. COVID-19 pandemııasymen kúres kezinde atalǵan taqyryptyń ózektiligin eskere otyryp, agenttik Qazaqstan Respýblıkasynyń Densaýlyq saqtaý mınıstrligin BNSR (Biosurveillance Network of the Silk Road countries) onlaın sessııasyna Qazaqstannyń densaýlyq saqtaý júıesin tsıfrlandyrý boıynsha tájirıbesin ózge memlekettermen bólisý úshin spıker retinde shaqyrdy.
Barlyq sessııalar Bnsr platformasynda Jibek joly elderiniń epıdemıologtary men medıtsına mamandary úshin ashyq alańda ótkiziledi.
Aıta keteıik, AQSh pen Qazaqstan - bıologııalyq qaýipti azaıtý jónindegi baǵdarlama aıasynda seriktes.
Qazirgi ýaqytta eki taraptyń da baǵdarlama sarapshylary Covid-19 pandemııasyna qarsy kúreske belsendi tartylǵan. Sondaı-aq, Ortalyq Azııa, Kavkaz, Taıaý Shyǵys jáne Shyǵys Eýropa elderinen shaqyrylǵan tar beıindi sala mamandary men kásibı medıtsına salasynyń tyńdaýshylarymen/qatysýshylarymen turaqty negizde beınekonferentsııalar ótkizilip turady.
Ótken aptada qazaqstandyq medıtsınalyq mekemeler men úkimettik qurylymdardyń ókilderi koronavırýsty emdeý hattamalaryna, taralýyna, ǵylymı tásilderine qatysty sessııalarǵa qatysqan bolatyn.