Qazaqstannyń medıtsınalyq oqý oryndarynda pedıatrııa boıynsha saǵattar sany ulǵaıtylady

ASTANA. QazAqparat - Qazaqstannyń Densaýlyq saqtaý jáne áleýmettik damý mınıstrligi jalpy praktıkalyq dárigerlerdiń (ári qaraı - JPD) bazalyq daıyndaý baǵdarlamasyn qaıta qarap, nátıjesinde pedıatrııa baǵytyndaǵy dıstsıplınanyń saǵattar sany 40-50%-ǵa ulǵaıtyldy. Ózgertilgen bilim berý baǵdarlamalary aǵymdaǵy jyldyń 1 qyrkúıeginen bastap engizilmek, dep habarlaıdy vedomstvo baspasóz qyzmeti.

Sonymen birge, QR DSÁDM-de ambýlatorlyq-emhanalyq qyzmet dárigerlerin daıyndaýdyń sapasyn arttyrý maqsatynda jalpy dárigerlik praktıkadaǵy mindetti rezıdentýrany engizý máselesi qarastyrylýda.

JPD daıyndaý standarttaryn ózgertý - medıtsınalyq kadrlardyń kásibı deńgeıin arttyrýǵa yqpal etetin bolady.

Búginde Qazaqstanda 3,5 myń JPD (qaıta baǵdarlanǵan ýchaskelik pedıatrlar úlesi - 36%, ýchaskelik terapevter - 35%) jumys isteıdi. Respýblıkada qazirgi tańda jalpy praktıkalyq dáriger 2 myńnan astam adamǵa qyzmet kórsetip keledi. Azamattar óz erkimen tirkele alady.

Aıta ketý kerek, JPD qyzmetin engizý ózge qyzmetterdiń, máselen, pedıatrlyq, terapevtik, hırýrgııalyq jáne t.b. salalardyń jabylýyna ákelgen joq. Ózgertý sharalary JPD jumys isteıtin ambýlatorlyq-emhanalyq kómek deńgeıindegi medıtsınalyq kómek kórsetý uıymdaryna qatysty boldy.

Jalpy praktıkalyq dáriger pedıatrııa, terapııa, hırýrgııa, akýsherlik jáne gınekologııa salalaryndaǵy, sonymen qatar, oftalmologııa, otorınolarıngologııa, nevrologııa, dermatologııa, kardıologııa syndy aralas mamandyqtar boıynsha bazalyq bilim men daǵdynyń negizderin bilýi tıis.

Eger jalpy praktıkalyq dáriger ádetten tys jaǵdaıǵa tap bolyp, mamannyń keńesi kerek bolsa, onda ol syrqat adamdy qosymsha tekserýge nemese baǵdarly mamandarǵa: terapevt, pedıatr, hırýrg, akýsher-gınekolog, ne bolmasa beıindi mamandarǵa: kardıolog, nevropatolog, kóz dárigeri jáne t.b. keńes alýǵa baǵyttaıdy.

Esterińizge sala keteıik, Qazaqstanda otbasylyq medıtsınany engizý 1997 jyldan bastaldy. Alǵashqyda pılottyq joba retinde Jezqazǵan, Qaraǵandy oblystarynda, sodan keıin respýblıka boıynsha engizildi. Densaýlyq saqtaý júıesindegi mundaı ózgerister Ulybrıtanııa, AQSh, Kanada, Izraıl jáne t.b. damyǵan elderde qoldanylatyn halyqaralyq tájirıbege negizdeldi. Otbasylyq medıtsına qaǵıdalary boıynsha, bir ǵana jalpy praktıkalyq dáriger barlyq otbasy múshelerin týylǵannan bastap, ómiriniń sońyna deıin baqylaıdy. Ol otbasynyń áleýmettik jaǵdaıyn, ómir súrý saltyn, tamaqtaný tártibin, jaǵymsyz ádetterin, tuqym qýalaıtyn aýrýlaryn, úıdegi qart adamdardyń, ata-ana men balalardyń densaýlyq jaǵdaıy týraly biledi. Onyń aýrýdyń aldyn alý, dıagnostıkalaý, emdeý tásilderi men keńesteri, syrqattanǵan adamdardy ońaltý sharalary tolyqqandy, negizdelgen jáne durys bolyp sanalady.