Qazaqstannyń medıtsına uıymdarynyń kredıttik qaryzy 87 mlrd teńgeni quraıdy

ASTANA. QazAqparat – Áleýmettik medıtsınalyq saqtandyrý qory (ÁMSQ) medıtsına uıymdarynyń boryshtyq júktemesin tómendetý úshin 60 mlrd teńge qosymsha qarajat bóledi, dep habarlaıdy QazAqparat tilshisi.

Atalǵan qordyń málimetinshe, búgingi tańda kredıtorlyq bereshek barlyq óńirler úshin ortaq ózekti másele. Jalpy Qazaqstan boıynsha boryshtyq júkteme shamamen 87 mlrd teńgeni quraıdy. Onyń 4,4 mlrd teńgesi Qyzylorda oblysynyń 20 memlekettik medıtsınalyq uıymyna tıesili.

Atalǵan oblysqa saparmen baryp, óńirdegi medıtsınalyq uıymdardyń bas dárigerlerimen kezdesken Áleýmettik medıtsınalyq saqtandyrý qorynyń basshysy Sábıt Ahmetovtiń aıtýynsha, bul máseleni sheshý qordyń tikeleı quzyryna kirmeıdi. Biraq ÁMSQ-nyń tarapynan kómek kórsetiledi. Shilde aıynyń sońyna deıin barlyq óńirlerge shamamen 60 mlrd teńge qosymsha qarjy bólý josparlanǵan. Onyń 5,2 mlrd teńgesi medıtsınalyq uıymdar arasynda bólý úshin qordyń Qyzylorda oblysyndaǵy fılıalyna jiberiledi.

Qor basshysynyń sózine qaraǵanda, Densaýlyq saqtaý mınıstrligi qazirdiń ózinde aýqymdy jumystar atqarýda. Atap aıtqanda, eDensaulyq biryńǵaı platformasy daıyndalyp jatyr. Ol 2024 jyldyń qańtaryna deıin iske qosylýy tıis. Sondaı-aq medıtsınalyq kómektiń asa mańyzdy baǵyttarynyń jekelegen túrleri boıynsha tarıfterdi qaıta qaraý josparlanǵan.

Buǵan deıin elimizde medıtsınalyq qyzmetterdiń tarıfi qaıta qaralatynyn jazǵan edik.

Sondaı-aq Qostanaı oblysynyń Densaýlyq saqtaý basqarmasy óńirdegi densaýlyq nysandarynyń kredıtorlyq joǵary bereshegine baılanysty oblys basshysy Qumar Aqsaqalovtan qosymsha qarjy bólýdi suraǵan bolatyn.