Qazaqstannyń mashına jasaý salasynda eksporttyq áleýetti arttyrý múmkindikteri jetkilikti - M. Pishembaev
ASTANA. QazAqparat - Byltyr elimizden shamamen 60 mln. dollardan astam mashına jasaý salasynyń ónimderi eksporttalǵan bolatyn. Bıyl bul kórsetkish birshama tómendep ketti. Degenmen, bul salada eksporttyq áleýetter barshylyq. Búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıng barysynda Qazaqstan Mashına jasaýshylar odaǵynyń basqarma tóraǵasy, Májilis depýtaty Meıram Pishembaev osylaı málim etti. Eske sala keteıik, baspasóz máslıhaty Astanada 1-2 qazanda Mashına jasaýshylardyń úshinshi halyqaralyq forýmy taqyrybyna arnalǵan bolatyn.
«Bıylǵy eksporttyń tómendeý sebebi barshaǵa belgili, árıne bul eń birinshiden Reseıdegi ekonomıkalyq ahýalǵa baılanysty boldy. Degenmen, tutastaı alǵanda 2012-2013 jyldar aralyǵynda bizdegi eksporttyq jaǵdaı tipti tómen edi. Joǵaryda aıtylǵan eksporttyq alpys mıllıon dollardy quraıtyn ónimniń ishinde elimizde shyǵarylǵan avtomobılder, akkýmýlıatorlar, munaı-gaz salasynyń burǵylary, saımandary, elektrlik qosalqy stansalar bar. Tutastaı alǵanda bizdiń otandyq mashına jasaý salasy úshin eksportty arttyratyn áleýetter jetkilikti», - deıdi M. Pishembaev.
Onyń sózine qaraǵanda, aldaǵy halyqaralyq forýmda bul máselege kóbirek mán berilip, eksporttyq áleýetti arttyrý eń mańyzdy máseleniń biri retinde qarastyratyn bolady.
Eske sala keteıik, astanada ótetin forým «Jańa ekonomıkalyq jaǵdaılar aıasyndaǵy mashına jasaý salasynyń problemalary men perspektıvalary» atty taqyrypta órbıdi. Forým alańynda mashına jasaý salasynyń máselelerin qamtyǵan jeti sektsııa jumys istemek. Sharaǵa otandyq 450-500 uıymnan ókilder, sonymen qatar álemniń otyz elinen eki júzge tarta delegattar keletini kútiledi.
