Qazaqstannyń mádenıet qaıratkerleri Eýrazııa syılyǵyna ıe boldy
ASTANA. QazAqparat - Eýrazııalyq shyǵarmashylyq Odaq «Erekshe jetistikteri» úshin Qazaqstannyń birqatar óner jáne mádenıet qaıratkerlerine Eýrazııa premııasyn tabystady, dep habarlaıdy «QazAqparat» HAA tilshisi.
«Erekshe jetistikteri» úshin tabystalatyn Eýrazııa premııasy - bul óner, ádebıet, ǵylym men sport, áleýmettik mańyzy bar jetistikter úshin beriletin halyqaralyq marapat. Halyqaralyq syılyq 2013 jyldan bastap berilip keledi.
18 nomınatsııa boıynsha atalǵan marapatqa 30 adam ıe boldy. Qazaqstandyq laýreattardyń qatarynda kompozıtor Arman Dúısenov, Álibı Mámbetov, opera ánshisi Nurjamal Úsenbaeva men ánshi Janna Sattarova (qaıtys bolǵannan keıin), músinshi Edýard Kazarıan, Lermontov atyndaǵy drama teatrynyń ártisi Tatıana Banchenko, bıologııa ǵylymdarynyń doktory, respýblıkalyq basty botanıkalyq baqtyń dırektory Gúlnar Sıtpaeva, QR Bas onkology Dılıara Qaıdarova, tsırk sheberi Murat Mutyrǵanov, rejısser Aqan Sataev jáne taǵy basqalary bar. Álemdik kıno ónerine erekshe úlesin qosqany úshin Asanáli Áshimov, tsırk ónerin órkendetkeni úshin Murat Mutyrǵanov marapattalyp, radıonyń damýyna serpin bergen úshin Gúlbahor Hasanova men Dıana Snegına syılyqqa ıe boldy.
Halyqaralyq deńgeıdegi qaıratkerlerge marapat 12 qyrkúıekte Máskeýde - RF Dıplomatııalyq akademııasynda, al qazaqstandyqtarǵa Almatydaǵy Reseıdiń Bas konsýldyǵynda tabystaldy. Eýrazııalyq shyǵarmashylyq Odaq - ol kommertsııalyq emes qoǵamdyq uıym bolyp tabylady. Onyń basty maqsaty - adamdardyń ıntellektýaldyq jáne shyǵarmashylyq damýyna qoldaý bildirý. Eýrazııalyq shyǵarmashylyq Odaqtyń prezıdenti - qazaqstandyq aqyn, dramatýrg Karına Sarsenova.
